SpaceX космик сайёҳлар билан ХКСга иккинчи кемани учирди

Американинг SpaceX хусусий компанияси яна коинотга бутунлай хусусий миссиясини жўнатди. Axiom тижорат дастури доирасида Falcon 9 ракетаси Crew Dragon бошқариладиган космик аппарати билан 21 май, якшанба куни кечқурун Халқаро космик станцияга (ХКС) учирилди, деб хабар берди SpaceX. 

Кемага NASA собиқ астронавти ва ХКСнинг биринчи аёл командири Пегги Уитсон қўмондонлик қилади, учувчи – тадбиркор Жон Шофнер, экипаж аъзолари эса саудиялик астронавтлар Райян Барнави ва Али ал-Карнидир. Астронавтлар ХКСда саккиз кун бўлиб, унинг доимий экипажи билан бирга ишлайди. 

Космик кема Флорида штатидаги Канаверал бурнидаги Кеннеди космик марказидаги 39В старт комплексидан учирилди. ХКС билан туташув 22 май куни Тошкент вақти билан соат 18:24 да режалаштирилган. 

Бу - Американинг Axiom компанияси дастури бўйича ХКСга иккинчи тижорий парвоз. Тижорий астронавтларнинг биринчи миссияси - Axiom-1 - ўтган йилнинг апрель ойида бўлиб ўтди. 2023 йил охирида учинчи Axiom (Ax-3) миссиясини амалга ошириш режалаштирилган, унинг доирасида тўрт кишилик экипаж ХКСда икки ҳафта вақт ўтказади.

Миссиянинг ҳар бир аъзоси учун парвоз нархи 50 миллион долларга баҳоланмоқда. SpaceX билан келишувга кўра, эндиликда Axiom Space дастури бўйича космик сайёҳлар парвозлари йилига икки-уч марта амалга оширилиши режалаштирилган.