«Россия кўнгиллилар корпуси» Россияда янги рейд ўтказилишини эълон қилди

Белгород вилояти, Глотово қишлоғидан олинган видеода икки жангчи Россия почтасининг Глотоводаги идораси ёнида тургани акс этган. 

«Албатта, бу сафар ҳеч кимга видеони Киев вилоятида эмас, балки ватанда тасвирга туширганимизни исботлаш шарт эмас. Шунга қарамай, биз бундай видеоларни яхши анъанага айлантиришга қарор қилдик», дейилади видеога қолдирилган изоҳда. 

У аниқ қачон олинганлиги ҳақида хабар берилмаган. «Дождь» нашрининг ёзишича, видеодаги одамлардан бири - РКК қўмондони Денис Никитин (Капустин). 

Унинг сўзларига кўра, РКК «Россия ҳудудига бемалол кириб келяпти - жанглар билан ёки жимгина, энди бу муҳим эмас». «Бизни ўз аҳоли пунктингизда кутинг», — деди у. 

22 май куни Белгород вилоятида Украина ҳудудидан кириб келган бўлинмалар билан тўқнашувлар юз берди. Россия Федерацияси ҳукумати «диверсантларнинг мағлубияти» ҳақида эълон қилди, ўз навбатида, РКК ва «Россияга озодлик» легиони Белгород вилоятининг бир нечта аҳоли пунктлари «озод этилгани» тўғрисида маълумот берди.