Латвия ташқи ишлар вазири Эдгарс Ринкевичс Сейм депутатларининг кўпчилиги томонидан қўллаб-қувватланди ва Эгилс Левитсни давлат раҳбари сифатида алмаштиради.
Бунгача ташқи ишлар вазири лавозимини эгаллаб келган Эдгарс Ринкевичс Латвия президенти этиб сайланди. 31 май, чоршанба куни Сейм депутатларининг аксарияти учинчи тур якунларига кўра унинг номзоди учун овоз берди. Шу тариқа, у асосий рақиби, бизнесмен Улдис Пиленсни мағлуб этди ва бу лавозимда Эгилс Левитснинг ўрнини эгаллайди. Пиленс учун 25 депутат, Ринкевичс учун 52 депутат овоз берди.
Иккинчи овоз бериш босқичида Ринкевичсни 42 депутат қўллаб-қувватлади, 45 депутат унинг номзодига қарши чиқди. Пиленс учун 25 депутат ёқлаб, 62 депутат қарши овоз берди. Президент лавозими учун учинчи номзод - Европада Латвия диаспораси фаоли, евроамалдор Элина Пинто 10 та овоз олди, 77 депутат унга қарши чиқди. Шу тариқа, Пинто президентлик пойгасидан чиқиб кетди. Овоз беришнинг биринчи босқичида ҳам овозлар худди шундай даражада бўлди.
Латвия президенти биринчи навбатда вакиллик функцияларини бажаради. Унинг сайланиши учун Сейм депутатларининг 100 нафардан 51 нафарининг кўпчилик овози талаб қилинади. Агар уларнинг ҳеч бири 51 та овоз ололмаса, 10-15 кундан кейин янги сайловлар ўтказилади. Латвиядаги уч партияли ҳукмрон коалиция – «яшиллар», консерваторлар ва минтақавий партия Сеймда 54 ўринга эга.
