Фармацевтика тармоғини ривожлантириш агентлиги директори ўринбосари Жамшид Эшмуродов ва Мисрнинг ACDIMA фармацевтика компанияси бош ижрочи директори Улфат Ғураб ўртасида онлайн музокара ташкил этилди, деб хабар бермоқда «Дунё».
Суҳбат чоғида Ўзбекистоннинг дори воситаларига бўлган талаби тез суръатлар билан ортиб бораётгани таъкидланди. Ҳозирда республика Европа мамлакатлари, Хитой ва Ҳиндистондан сифатли ҳамда арзон дори воситаларини импорт қилаётгани, унинг ҳажми 2 миллиард долларга етгани маълум қилинди.
Томонлар ACDIMA дори воситаларини Ўзбекистондаги йирик фармацевтика компаниялари билан ҳамкорликда ишлаб чиқариш истиқболлари хусусида фикр алмашди.
Ушбу йўналишдаги музокараларни давом эттириш мақсадида компания раҳбари Улфат Ғураб бошчилигидаги делегациянинг мамлакатга сафарини июль ойида ташкил қилиш бўйича келишиб олинди.
