АПЛда энг кўп кутилаётган 5 трансфер. «Арсенал» барчадан кўпроқ сарфлайдими?

Европанинг кўплаб клублари камтарона ҳаёт тарзини давом эттираётган маҳалда, Англияда шов-шувли трансферларни амалга оширишда давом этишмоқда. Кўплаб келишувлар рўй бериб бўлди. Масалан, «Челси» «РБ Лейпциг» ҳужумчиси Кристофер Нкунку трансферини эълон қилди. «Ливерпул» «Брайтон»дан аргентиналик ҳавбек Алексис Мак Аллистерни сотиб олди. Жеймс Милнер эркин агент мақомида қарама-қарши йўналишда ҳаракатланди. «Астон Вилла» «Лестер» билан шартномаси муддати тугаган Юри Тилемансни ўз сафига қўшиб олди.

Ёзнинг катта қисми ҳали олдинда ва катта эҳтимол билан яна кўплаб катта трансферлар амалга оширилади. Инсайдерлар (жумладан Фабрицио Романо ва Дэвид Орнштейн) маълумотига кўра, кейинги беш йирик трансфер АПЛнинг ички бозорида амалга оширилади. Ўз ўзидан аксар ҳолатлар «Челси» ўз футболчиларини сотиши билан боғлиқ, чунки бу клубда футболчилар ҳаддан ташқари кўпайиб кетган (қолаверса, лондонликлар янги харидларни амалга оширишда давом этмоқда).

Матео Ковачич, 29 ёш
«Челси» → «Манчестер Сити»

Хорватиялик яримҳимоячи «Челси»да беш мавсум ўтказди, аммо энди клубда сотув даври бошланди. Янгиланаётган жамоада Ковачич кетиши керак бўлган футболчилар қаторида. Қолаверса, унинг шартномаси кейинги йил ёзида тугайди ва клуб уни бу йил 30-35 млн фунтга сотиб қолиш имкониятидан фойдаланиши керак. Катта эҳтимол билан Матео «Сити»га ўтади, клуб ва ҳавбек икки ҳафта олдинроқ келишувга эришгани айтилмоқда.

Хабарларга кўра, клублар ўртасида ҳам барча масала ҳал бўлган ва футболчи тиббий кўрикдан ўтса бас. «Сити» айнан майдон марказини кучайтиришга эҳтиёж сезмоқда, ўтган мавсумда бу жойда Родри, Илкай Гундўған ва Кевин Де Брюйне деярли ротациясиз ўйнади. Бернарду Силва ҳам бор, аммо у кўпинча ҳужум учлигида ҳаракатланади. Бу позицияга футболчилар етарли эмаслиги туфайли марказий ҳимоячи Жон Стоунз ҳам таянч яримҳимоясига чиқиб ўйнашига тўғри келди. Гундўғаннинг шартномаси якунланиб, «Барселона»га йўл олаётгани туфайли бу зонага яна бир футболчи олиб келиш шунчаки зарурият.

Мэйсон Маунт, 24 ёш
«Челси» → «Манчестер Юнайтед»

Бу «Челси» фанатларини қаттиқ ранжитувчи трансферлардан бири. Маунт – клуб тарбияланувчиси. У клуб академиясига олти ёшлигида келган. Фрэнк Лэмпард «Челси»ни биринчи бор бошқарганида, Маунтни хатоларига қарамай ўйнатаверган, натижада Мэйсон 24 ёшига келиб Чемпионлар лигаси ғолиби бўлди ва Англия миллий жамоасида 36 ўйин ўтказди.

2022/2023 йилги мавсум ушбу яримҳимоячи учун ўта муваффақиятсиз чиқди, кўплаб жамоадошлари билан бўлгани каби. Футболчига янги чақириқлар керак ва у жамоадоши Ковачич каби Манчестерга йўл олиши кутилмоқда. Фақат шаҳарнинг бошқа жамоасига. «Челси» «қизил иблислар»нинг 45 млн фунтлик биринчи таклифини ҳам, 58 млн фунтлик иккинчи таклифини ҳам рад этган, аммо инсайдерлар ҳамон Маунтни «Юнайтед»нинг ёзги трансферлар ойнасидаги асосий нишони деб қарашмоқда. Лондонликлар футболчи учун 60-65 миллион фунт стерлинг олишни кўзлаган.

Кай Ҳаверц, 24 ёш
«Челси» → «Арсенал»

Ҳаверц АПЛнинг ўтган мавсумида «Челси» таркибида энг кўп вақтни майдонда ўтказган (2579 дақиқа) футболчи ва жамоанинг энг яхши тўпурари (7 гол) бўлди. У кетишни истаётгани ва «Арсенал» билан беш йиллик шартнома бўйича келишиб олгани маълум. Германиялик футболчи «Челси» раҳбариятига кейинги йил муддати тугайдиган  шартномасини узайтирмаслигини билдирган. Клуб «Арсенал»нинг биринчи таклифини қайтарган, аммо иккинчисига (уч йил давомида 60 млн фунт тўлаб берилади, маълум натижалар учун 15 млн фунт миқдорида бонус кўзда тутилган) рози бўлган.

Шу билан бирга, Ҳаверц «Арсенал»да қайси позицияда ўйнаши тушунарсиз. Ўтган мавсумда Кай орқароққа сурилган ҳужумчи ҳам, вингер ҳам, марказий форвард ҳам бўлиб ўйнади. Ҳозирда у Жезус ёки Сакани таркибдан сиқиб чиқаришини тасаввур қилиш қийин. Бошқа томондан, «Арсенал» кўп йиллик танаффусдан кейин Чемпионлар лигасига қайтмоқда ва жамоа обоймани кенгайтириши зарур.

Деклан Райс, 24 ёш
«Вест Ҳэм» → «Арсенал»

«Вест Ҳэм» учун мавсум энг охирида муваффақиятсизликдан омадли мавсумга айланди. Жамоа нафақат лигада жон сақлаб қолди, балки Конференциялар лигасида ғолиб чиқиб, Европа Лигасига йўлланма олди. Энди клуб учун навбатдаги мақсад – Райс сотувидан максимум фойда чиқариш. АПЛда англиялик футболчилар бошқалардан кўра қимматроқ туради, айниқса гап миллий жамоанинг асосий футболчиси ҳақида кетганда.

«Вест Ҳэм» «Арсенал»нинг икки таклифини қайтарди (иккинчиси — 75 млн фунт + маълум натижалар учун 15 млн фунт кўринишидаги бонуслар). Хабарларга кўра, Артета жамоаси учинчи таклифни ҳам юборади. Ўтган мавсум охирида захира ўриндиғи кенг эмаслиги туфайли чемпионликни бой берган жамоа яримҳимоя чизиғини кучайтиришга катта эҳтиёж сезмоқда. Аввалроқ жамоа сардори Чака Германияга қайтиши ҳақида маълум бўлганди, энди Парти ҳам Саудия Арабистонига йўл олиши ҳақида хабарлар чиқмоқда. Улар эса жамоанинг асосий икки таянч яримҳимоячиси эди. Шундай экан, «Арсенал» Райсни қўлга киритиш ҳаракатларини тўхтатмайди. Бу вақтда «Вест Ҳэм» «Сити» курашга қўшилишини кутмоқда. «Шаҳарликлар» уларнинг молиявий талабларини тўла қаноатлантириши мумкин. 

Мойсес Кайседо, 21 ёш
«Брайтон» → «Челси»

Бу рўйхатдаги энг ёш футболчи. У АПЛда биринчи тўлақонли мавсумини ўтказди, аммо шу вақт унга топ-футболчи мақомига чиқиш учун етарли бўлди. «Челси» унга ўтган йил ёзида ҳам даъвогарлик қилган, аммо ўшанда трансферни амалга ошира олмаганди. Энди эса лондонликлар клуби қишда «Арсенал»га ўтиши мумкин бўлган, шунингдек «Бавария»нинг қизиқишлари доирасида турган футболчи билан келишувга эришди.

Ушбу яримҳимоячининг «Брайтон» билан шартномаси 2027 йил ёзига қадар тузилган. Бундай вазиятда футболчи клубдан кетиши осон бўлмайди, аммо унда мураббий билан шу йил ёзда кетиш бўйича келишув бор. Хабарларга кўра, бу трансфер «Челси»га 90 млн фунтга тушиши (80 млн фунт + 10 фунт бонуслар) кутилмоқда.