Янгийўлда 15 гектар ғалладан бўшаган ер майдони ёниб кетди

Янгийўл туманида ғалладан бўшаган ер майдонида йирик ёнғин содир бўлди.

Бугун, 23 июнь куни соат 11:33 да Тошкент вилояти Янгийўл тумани «Саид ота» МФЙ ҳудудидаги йўл ёқасида тахминан 15 гектар ғалладан бўшаган ер майдонда ёнғин содир бўлган.

Шунга кўра 2 та ёнғин-қутқарув экипажи соат 11:56 да воқеа жойига етиб бориб, ёнғин соат 13:10 да ўраб олинган ва 14:10 да ўчирилган.

Ҳодиса оқибатида тан жароҳати олган ва ҳалок бўлганлар йўқ.

Фавқулодда вазиятлар вазирлиги барча деҳқонлар, фермерлар ва фуқаролардан ғалладан бўшаган ер майдонларини ёнғиндан сақлаш ишига масъулият билан қарашни сўраган.