Рустам Ашуров олган жароҳатларидан ҳушига келмай вафот этган. У Молдовага кирмоқчи бўлганида икки чегарачини ўлдирган.
30 июнь куни Кишинёв аэропортида чегара хизматининг икки зобитини отиб ўлдирган Тожикистон фуқароси Рустам Ашуров олган жароҳатларидан вафот этди. Бу ҳақда 3 июль, душанба куни Молдова Ички ишлар вазирлиги бош полиция инспекциясида маълум қилинди. Қўлга олиш пайтида Ашуров ўнта ўқ жароҳати олган, ўпкасининг бир қисми касалхонада олиб ташланган, у ўзига келмаган.
Ашуров Туркиядан Кишинёвга учиб келган. У Душанбе шаҳрида, маҳаллий полиция маълумотларига кўра, уюшган жиноий гуруҳ таркибида «Ориенбанк» раисининг биринчи ўринбосари Шуҳрат Исматуллоевни ўғирлашда иштирок этганидан кейин Европа давлатларидан бирида бошпана топишга уринган. Ўғирлаш 23 июнь куни содир бўлган. Тожикистон Ички ишлар вазирлиги ўғирланган шахсни топишга ёрдам берадиган маълумот учун 30 минг доллар мукофот эълон қилган, бироқ ҳозирча бу натижа бермаган.
Аэропортдаги отишма паспорт назорати ходимлари эркакка Молдовага киришига рухсат бермаганидан кейин бошланган. Чет эл фуқаросини жўнаб кетаётган мамлакатга қайтишини расмийлаштириш учун стерил зонага кузатиб боришга қарор қилинган, бироқ у полициячидан қуролини тортиб олиб, ўқ отишни бошлаган.
Оқибатда икки киши - чегара полицияси ва аэропорт хавфсизлиги ходимлари ҳалок бўлган, бир йўловчи жароҳатланган. Эркак аэропорт биноларидан бирида гаровга олинганлар билан ўзини тўсмоқчи бўлган, бироқ яраланган ва ушланган.
Воқеа муносабати билан Кишинёв халқаро аэропортида махсус иш режими жорий этилган ва хавфсизлик чоралари кучайтирилган. Аэропорт фақат 1 июль куни тушдан кейин нормал иш режимига қайтди.
