АҚШ Россияни Суриядаги дронларини таъқиб қилишни тўхтатишга чақирди

Америка Қўшма Штатлари Ҳарбий-ҳаво кучлари 24 соат ичида иккинчи шундай ҳодиса ҳақида хабар берди ва бу барча ҳаво кемаларни хавф остига қўйганини таъкидлади.

Фото: Smh

6 июль, пайшанба куни АҚШ Ҳарбий-ҳаво кучлари маълум қилишича, Россия қирувчи самолётлари Сурия осмонида яна бир неча АҚШ дронларига хавфли даражада яқин учиб ўтиб, уларни манёвр қилиш ва қочишга мажбур қилди. Бу 24 соат ичида содир бўлган иккинчи шундай ҳодиса.

«Биз Суриядаги Россия кучларини бу бепарво хатти-ҳаракатни тўхтатишга ва профессионал ҳаво кучларидан кутилаётган стандартларга риоя қилишга чақирамиз, шунда биз яна бор эътиборимизни ИШИДни мағлуб этишга қаратишимиз мумкин», — деди Ҳарбий-ҳаво кучлари генерал-лейтенанти Алексус Гринкевич.

Ҳарбий ҳаво кучлари марказий қўмондонлиги матбуот котиби полковник Майкл Эндрюснинг сўзларига кўра, «Россиянинг таъқиби, жумладан, Су-34 ва Су-35 қирувчиларининг яқин масофадаги парвозлари, шунингдек, тўғридан-тўғри MQ-9 учувчисиз учоғи сигнал ракеталарини отиши деярли бир соат давом этди».

Аввалроқ АҚШ Ҳарбий-ҳаво кучлари чоршанба куни юз берган воқеа акс этган видеони эълон қилган эди. Кадрларда Россиянинг Су-35 самолёти Американинг MQ-9 Reaper самолётига яқинлашганини кўриш мумкин. Кейин дроннинг парвоз йўли бўйлаб ҳаракатланаётган бир нечта парашютли сигнал ракеталари кўрсатилган. Иккинчи ҳодисада, «Россия самолёти учувчисиз учиш қурилмалари олдига сигнал ракеталарини ташлади ва хавфли даражада яқин учиб ўтди, бу эса барча ҳаво кемаларига хавф туғдирди», деди Гринкевич.

АҚШ Марказий қўмондонлиги раҳбари, армия генерали Эрик Курилла Россиянинг Суриядаги ҳаво ҳудудини тозалаш бўйича олиб борилаётган саъй-ҳаракатларни тўхтатиши «эскалация хавфини оширади» деди.