ОАВ: Германия Украинанинг НАТОга киришини кечиктирмоқчи

Германия ҳукумати 11-12 июль кунлари Вилнюсда бўлиб ўтадиган НАТО саммитида Украинанинг альянсга киришини кейинга суришни талаб қилади. У бу қадам Россия билан урушга олиб келиши мумкинлигидан хавотирда. Бу ҳақда 8 июль, шанба куни The Telegraph газетаси НАТОдаги манбасига таяниб хабар берди.

Нашр суҳбатдошига кўра, бўлажак учрашув чоғида Берлин иттифоқчиларни Шимолий Атлантика альянсига қўшилиш таклифларига эмас, Киевга хавфсизлик кафолатларини беришга эътибор қаратишга чақиради. 

«Берлин зудлик билан аъзоликни таклиф қилиш истиқболидан қайтмоқда. Аъзоликни моҳиятан блоклаш, шунингдек, хавфсизлик кафолатларини ишлаб чиқиш учун жараён ва вақт керак», - деди манба. Унинг қўшимча қилишича, Берлин Россия президенти Владимир Путин НАТОнинг Коллектив мудофаа тўғрисидаги Низомининг «5-моддасини синовдан ўтказиб кўришини» истамайди. 

The Telegraph нашрининг ёзишича, АҚШ, Буюк Британия ва ЕИ давлатлари икки томонлама хавфсизлик кафолатларини ишлаб чиқмоқда, бу уларнинг фикрича, НАТОга аъзо бўлмаган тақдирда Украинани ҳимоя қилишга ёрдам беради. Бироқ Шарқий Европанинг айрим етакчилари, жумладан, Эстония бош вазири Кая Каллас Вилнюсдаги саммитда Украинага альянсга аъзолик бўйича йўл харитаси тақдим этилиши керак, деб ҳисоблайди. 

Аввалроқ АҚШ президенти Жо Байден Украинанинг НАТОга қўшилишини ҳали кўриб чиқилиши керак бўлган масала, деб атаган эди. У Киевга Исроил мисолида хавфсизлик кафолатларини, яъни моддий ёрдам ажратишни таклиф қилди.