Жанубий Африкада қор ёғди. Бунақаси 10 йилдан бери кузатилмаганди

10 июл куни Жанубий Африканинг энг йирик шаҳри Йоханнесбург аҳолиси уйғонганида дераза ортида қор ёғаётганига гувоҳ бўлди. Жанубий яримшарда июл ойи – қишки ой саналади, аммо бу ерда 10 йилдан буён қор ёғмаганди.

Фото: EPA/Vostock-photo

Ҳукумат аҳолига қалинроқ кийинишни тавсия қилган, чунки мамлакатнинг катта қисмини совуқ фронт қамраб олган ва бу камида бир ҳафта сақланиб қолиши кутилмоқда.

«Ҳозирча қор ёғиши жиддий муаммо келтириб чиқармаяпти», — дея хабар қилган BBC мухбирига Жанубий Африка метеорология хизмати (Saws).

Йоханнесбургнинг жанубий чеккаси Брокенҳёрстда қор қоплаган далалар. Фото: Reuters

Йоханнесбург аҳолиси қор билан қопланган кўчаларга мафтун бўлиб қолган — бу улар яшайдиган ҳудудда ўта ноёб ҳодиса.

«Айрим ўқувчилар, мен ҳам улар билан, қор билан яқиндан танишиш учун ташқарига чиқдик… кимдир қор нималигини билади, бошқалар эса бу шунчаки бошқачароқ ёмғир деб ўйлашади», — дейди бошланғич синф ўқитувчиси Агнес Мидева.

Уй ходимаси Нобухоси Стомпи BBC билан суҳбатда йўлни қор қоплагани туфайли ишга бормагани ва ҳеч қачон бундай манзарани кўрмаганини айтиб берган.

«Уйимиз иссиқ, шундай экан, барчаси жойида, — дея қайд этади нозир Билли Нксумало. — Қор ҳаммаёқда ёғмоқда, у районимиз атрофидаги далаларни қоплаб олди — бу чиндан ҳам чиройли».

Кўплаб мактаб ўқувчилари қорни илк бор кўришмоқда. Фото: EPA

Қор Жанубий Африканинг қатор провинциялари, жумладан Шарқий Кейп, Мпумалангу ҳамда Йоханнесбург ва Соуэто шаҳарларини ўз ичига олувчи Гаутенг регионида ёғган.

Метеорологлар фермерларга бундай совуқ ҳароратда чорва моллари учун мос иссиқ оғилхоналар топишни тавсия қилган.