Европа Иттифоқи депутатлари Молдова экспортига импорт божлари тўхтатилишини яна бир йилга узайтиришни маъқуллади. Молдовадан келаётган маҳсулотларнинг аксарияти божсиз олиб кирилиши сабабли, чора еттита қишлоқ хўжалиги маҳсулотига нисбатан қўлланади.
Европарламент Молдова маҳсулотларига қўлланадиган барча божхона ва импорт божларини тўхтатиб туришни маъқуллади. 11 июль, сешанба куни унга 577 депутат овоз берди, 36 нафари қарши чиқди, 18 нафари бетараф қолди.
Молдова маҳсулотларининг аксарияти ассоциация шартномаси бўйича Европа Иттифоқи бозорига божсиз кириш ҳуқуқига эга ва энди Европа Парламенти қолган еттита маҳсулот импортини либераллаштиришни узайтирди. Булар помидор, саримсоқ, узум, олма, олча, олхўри ва узум шарбати.
Страсбургдаги Европарламент депутатлари Молдова экспортига ЕИ импорт божлари тўхтатилишини яна бир йилга узайтиришни қўллаб-қувватлади. Ушбу чора 2023 йил 24 июлда тугайди. Бундан ташқари, Европа Парламентининг қарори Европа Иттифоқи Кенгаши томонидан тасдиқланиши керак, шундан сўнг у Европа Иттифоқининг расмий журналида эълон қилинади ва нашр этилгандан кейин кучга киради.
«Украина уруши бошланишидан олдин Молдова экспорти сезиларли даражада Россия бозорларига, шунингдек, транзит йўллари ва Украина инфратузилмасига боғлиқ эди, - деб эслатди Чехиядан Европарламент депутати Маркета Грегорова. - Мавжуд шароитдан келиб чиққан ҳолда, Молдова ўз маҳсулотларини хорижга сотишда жиддий қийинчиликларга дуч келмоқда. Мамлакат украиналик қочқинларни қўллаб-қувватлаш ва Россияга қарши Европа Иттифоқи санкцияларининг асосий қисмини қўллашда бирдамлик кўрсатгани сабабли, энди бу бирдамликни қайтариш ва унинг иқтисодиётини қўллаб-қувватлаш керак». Грегорованинг ишончи комилки, бу чоралар Молдова иқтисодиётини барқарорлаштиришга ва унинг Европа Иттифоқи бозорига интеграциялашувига ёрдам беради.
2022 йил 25 июлда кучга кирган либераллаштириш чора-тадбирлари Молдованинг ЕИ билан савдосига ижобий таъсир кўрсатди ва Европа Иттифоқига экспортини қайта йўналтиришга ёрдам берди: Брюссел маълумотларига кўра, Молдова экспортининг умумий ҳажми ЕИга 2021 йилдаги 1,8 млрд евродан 2022 йилдаги 2,6 млрд еврогача ошди.
2021 йилги статистик маълумотларга асосланган ҳисоб-китобларга кўра, Молдова учун импорт божлари тўлиқ бекор қилингани сабабли, Европа Иттифоқи учун божхона даромадларининг йўқолиши йилига 0,3 миллион еврони ташкил қилади, «шунинг учун Европа Иттифоқининг ўз ресурсларига чекланган таъсири жуда катта бўлади», дейилади қонун лойиҳасида.
Европа Иттифоқи ва Молдова ўртасидаги муносабатлар 2022 йил 23 июнь куни ЕИ Кенгаши унга ЕИга номзод давлат мақомини бергандан сўнг янги стратегик босқичга кирди.
