Европа Иттифоқи, БМТ ва Туркия Россияни «ғалла битими»га қайтармоқчи

Европа Иттифоқи Россия иштирокидаги «ғалла битими»ни қайтариш бўйича БМТ ва Туркия билан ишламоқда, деб хабар берди 18 июль, сешанба куни Европа Иттифоқининг Брюсселдаги юқори мартабали расмийси. «Бизнинг асосий мақсадимиз Россияни ушбу келишувдан чиқиш ҳақидаги қарорини қайта кўриб чиқишга мажбурлаш, - деди у. Россия ўз ҳаракатлари билан юз миллионлаб одамларни хавф остига қўяди». 

Расмий Европа Иттифоқи Россия билан музокаралар олиб бориш ниятида эмаслигини ва бу давлат раҳбаридан тўғридан тўғри таклиф олмаганини таъкидлади. Москва ўз позициясини БМТ ва Туркияга етказади, уларнинг раҳбарияти келишувларни янгилаш бўйича музокаралар олиб боради, сўнгра Россиянинг сўровларини Европа Иттифоқига етказади, деди у. 

Унинг сўзларига кўра, Европа Иттифоқи БМТ билан келгусидаги потенциал қадамлар бўйича ўз таклифларини муҳокама қилишга тайёр. «Биз ушбу масалалар бўйича санкцияларимизнинг ҳар қандай кутилмаган оқибатларини муҳокама қилишга тайёрмиз. Бу сиёсатимизни ўзгаришини англатадими ёки йўқми, Европа Иттифоқига аъзо давлатларга боғлиқ. Биз БМТни тинглашга ва ички муҳокама қилишга тайёрмиз», - дейди Брюссел расмийси.

У, шунингдек, Европа Иттифоқи Украинадан Европа «бирдамлик чизиғи» бўйича ғалла экспортини таъминлаш учун барча саъй-ҳаракатларини амалга оширишига ишонтирди. «Аммо биз бу муаммони тўлиқ ҳал қила олмаймиз», деди DW суҳбатдоши. 

Брюссел ушбу транспорт йўналишларини фаол равишда кенгайтиришга ваъда берди, Украина дони улар орқали денгиздан кўра кўпроқ олиб чиқилади.

Европа Иттифоқи ташқи ишлар вазирлари 20 июль куни Брюсселда Россиянинг Қора денгиз дон ташаббусидан чиқиши оқибатларини муҳокама қилади. Улар, шунингдек, Европа Иттифоқининг Украина олдидаги хавфсизлик мажбуриятларини ҳамда ҳарбий ва ноҳарбий ёрдамнинг кейинги қисмларини кўриб чиқади. Европа Иттифоқи Ташқи ишлар кенгашининг яна бир мавзуси Володимир Зеленскийнинг «тинчлик формуласи» ва ушбу ташаббусни илгари суриш бўлади.