«Толибон» Афғонистондаги барча сиёсий партияларни тақиқлади

«Толибон» ҳаракати Афғонистондаги барча сиёсий партияларнинг фаолияти шариатга зид эканини айтиб, уларни тақиқлади. «Толибон» ҳукуматидаги адлия вазири Абдул Ҳаким Шараи 17 август, пайшанба куни Кобулдаги матбуот анжуманида ушбу тақиқ ҳақида маълум қилди.

«Мамлакатда сиёсий партиялар фаолиятида шариат асослари йўқ. Улар миллий манфаатларга хизмат қилмайди, халқ эса уларни қадрламайди», - дея таъкидлади Абдул Ҳаким Шараи.

70 дан ортиқ йирик ва кичик сиёсий партиялар Афғонистон Адлия вазирлигида икки йил аввал, «Толибон» мамлакат устидан назоратни қайта қўлга киритгунга қадар рўйхатга олинган эди.

Айни пайтда БМТнинг Афғонистонга ёрдам кўрсатиш миссияси (UNAMA) ўтган ўн кун ичида мамлакатнинг олти вилоятида «Толибон» томонидан журналистлар қўлга олинганини эслатди. Миссия расмийларнинг сўз эркинлиги ҳуқуқини ҳурмат қилиш мажбурияти ҳақида эслатди.

Афғонистон «Чегара билмас мухбирлар» ташкилотининг матбуот эркинлиги рейтингида 180 поғонадан 152-ўринни эгаллайди.

Икки йил аввал, 2021 йил 15 августда Афғонистонда «Толибон» ҳаракати ҳокимият тепасига келган эди. Толибон НАТО бошчилигидаги Халқаро хавфсизлик кучлари (ISAF) олиб чиқиб кетилганидан кейин бир неча ҳафта ичида бутун мамлакатни назорат остига олди.

«Афғонистон жамияти руҳий тушкунликка тушиб, чарчаган. Иқтисодиёт вайронага айланган. 20 миллиондан ортиқ одам қашшоқлик чегарасида яшаб, ҳаёт учун курашмоқда», - дейди журналист, Ariana телерадиокомпанияси собиқ раҳбари Хушал Асефи.