АҚШда Proud Boys ултраўнгчилар ташкилоти собиқ раҳбари 22 йилга қамалди

Proud Boys ултраўнгчилар ташкилоти собиқ етакчиси Энрике Таррио 2021 йил 6 январда Капитолийга бостириб киришга алоқадорлиги учун 5 сентябр, сешанба куни Вашингтондаги суд томонидан 22 йиллик қамоқ жазосига ҳукм қилинди. У фитнада айбдор деб топилган. Тарриога ҳукм 2021 йил 6 январдаги тартибсизликлар ишида энг оғир жазо бўлди. Таррионинг адвокатлари апелляция шикояти берди. 

6 январ куни Доналд Трампнинг минглаб тарафдорлари Конгресс биносига бостириб кирган пайтда Энрике Таррионинг ўзи Вашингтонда бўлмаган. Бироқ, судья Таррио «фитнанинг раҳбари» эканини таъкидлади. Тергов унинг исён пайтида Proud Boys ҳаракатларини назорат қилганини аниқлади. Терговчиларга кўра, у америкалик ўнг экстремистлар орасида «алоҳида нуфузли шахс» ҳисобланади. Аввалроқ суд Proud boys’нинг яна икки етакчисига ҳукм чиқарган эди: Жозеф Биггс 17 йилга, Итан Нордин эса 18 йилга озодликдан маҳрум этилган. 

Капитолийга ҳужум 

2021 йил 6 январ куни президентлик сайловларида мағлуб бўлган Доналд Трамп тарафдорлари президентлик сайлови натижаларини тасдиқлаш вақтида Конгресс биноси олдида тартибсизликлар уюштирди. Намойишчилар бинога бостириб кирган, Конгрессдаги мунозаралар бир неча соатга тўхтатилган, қонун чиқарувчилар эвакуация қилинган. Полиция ҳужум иштирокчиларига қарши кўздан ёш оқизувчи газ ишлатган, Миллий гвардия Вашингтонга етиб келган. 

Тартибсизликлар пайтида беш киши ҳалок бўлди, 50 га яқин киши қўлга олинди, уларнинг баъзиларига айблов эълон қилинди. Ҳужумнинг бир неча иштирокчиси аллақачон турли муддатларга қамоқ жазосига ҳукм қилинган. Тергов фикрича, Proud Boys ва Oath Keepers акциянинг асосий иштирокчилари бўлган. 

Капитолийга бостириб кириш ишида жами мингдан ортиқ одам иштирок этмоқда - жумладан, Доналд Трамп ҳам. АҚШ собиқ президенти 2020 йилги сайлов натижаларини бекор қилишга уринишда айбланмоқда. У ўзининг айбсизлигини таъкидлади.