АҚШ Украинага яна 1 миллиард долларлик ёрдам ажратади 

АҚШ давлат котиби Энтони Блинкен 6 сентябр, чоршанба куни расмий, аммо эълон қилинмаган ташриф билан Киевга келди. Унинг келиши Вашингтон Украина Қуролли кучларининг уч ойдан бери давом этаётган қарши ҳужумини қўллаб-қувватлаётганидан далолатдир. «Биз Украинада ўзига керак бўлган ҳамма нарса борлигига ишонч ҳосил қилишни истаймиз – нафақат қарши ҳужумда муваффақият қозониш, балки узоқ муддатда ҳам тўхтатувчи кучга эга бўлишига ишонч ҳосил қилиш учун», — деди АҚШ Давлат департаменти раҳбари Украина ташқи ишлар вазири Дмитрий Кулеба билан Киевдаги учрашувда.

Блинкеннинг сўзларига кўра, Вашингтон «кучли иқтисодиёт, кучли демократияни барпо этаётган ва тиклаётган ҳамкорлар» билан алоқани давом эттиришга қатъий қарор қилган. Киевга келгач, Энтони Блинкен Дмитрий Кулеба билан бирга Берковец қабристонига ташриф буюрди ва у ерда ҳалок бўлган украиналиклар хотирасига ҳурмат бажо келтирди. Украиналик журналист Иля Пономаренко Давлат департаменти раҳбарига Украина ҳудудларини миналардан тозалашда иштирок этган дунёга машҳур Патрон ити кўрсатилган видеони эълон қилди. 

Блинкен Киевга 1 миллиард долларлик ёрдам пакети тақдим этилишини маълум қилди

Украинада Блинкен АҚШнинг мамлакатга қиймати 1 миллиард доллардан ортиқ бўлган янги ёрдам пакети тақдим этилишини эълон қилди, деб ёзади Reuters АҚШ ташқи сиёсатидаги юқори лавозимли амалдорга таяниб. 

Энтони Блинкен «Киевда кунни Берковец қабристонида ҳалок бўлган қаҳрамонларимиз хотирасига ҳурмат бажо келтиришдан бошлаган бошқа давлатнинг биринчи ташқи ишлар вазири бўлди», деб ёзди Дмитрий Кулеба ижтимоий тармоқларда. «Бу бизнинг эркинлигимиз ва яшаш ҳуқуқимиз учун жонини фидо қилган барча украиналик аскарларга ҳурмат белгисидир», — дея қўшимча қилди у. 

Блинкен Украинада икки кун бўлади 

АҚШ давлат котиби Украина ҳужуми бошланган июн ойидан бери Киевга ташриф буюрган биринчи юқори мартабали Оқ уй мулозимидир. Блинкен кеча эрталаб Киевга поездда етиб келди. Бу унинг Украинага тўлиқ миқёсли Россия ҳарбий ҳаракатлари бошланганидан бери тўртинчи ташрифидир. У мамлакатда икки кун қолади ва Володимир Зеленский билан ҳам учрашади. Шунингдек, Киевдаги музокараларда Украина Қуролли кучларининг давом этаётган қарши ҳужуми, Украина армияси эҳтиёжлари ва қиш мавсуми олдидан энергетика инфратузилмасини мустаҳкамлаш масалалари муҳокама қилинади. «Биз учун асосийси - украиналикларнинг ўзидан ҳақиқий вазият бўйича маълумот олиш», деди Reuters агентлигига манба. 

Оммавий ахборот воситаларида Энтони Блинкеннинг Украинага ташрифи эҳтимоли ҳақида бир кун аввал норасмий маълумотлар тарқалганди, бироқ АҚШ Давлат департаменти бу маълумотга изоҳ беришдан бош тортди. 6 сентябрга ўтар кечаси Украина шаҳарлари, жумладан, Украина пойтахти ракета ва дронлардан фойдаланган ҳолда оммавий ўққа тутилди. Ҳаво ҳужуми ҳақида тревога сигнали Блинкен келишидан бир неча соат олдин ўчирилган.