ФИФА 2023 йилнинг энг яхши ўйинчиси, мураббийи ва дарвозабонига топшириладиган The Best соврини учун номзодлар рўйхатини эълон қилди.
ФИФАнинг йил ўйинчиси соврини учун 12 нафар футболчи даъвогарлик қилмоқда.
Рўйхатдан Кевин де Брюйне («Манчестер Сити»), Бернарду Силва («Манчестер Сити»), Хвича Кварацхелия («Наполи»), Эрлинг Ҳоланд («Манчестер Сити»), Хулиан Альварес («Манчестер Сити»), Илкай Гундўған («Барселона»), Родри («Манчестер Сити»), Лионель Месси («Интер Майами»), Виктор Осимҳен («Наполи»), Килиан Мбаппе («ПСЖ»), Деклан Райс («Вест Ҳэм»/»Арсенал»), Марцело Брозович («Интер», «Ан-Наср») сингари ўйинчилар жой олган.
Қайд этиш жоиз, номзодлар рўйхатини шакллантиришда футболчиларнинг 2022 йил 19 декабрь кунидан 2023 йилнинг 20 август кунига қадар натижалари инобатга олинган. Яъни, ғолибни аниқлашда ЖЧ-2022даги натижалар ҳисобга олинмайди. Маълумот учун, The Best совринининг амалдаги соҳиби Лионель Месси саналади.
ФИФА йилнинг энг яхши дарвозабонига топшириладиган The Best соврини учун эса якуний бешликдан Яссин Буну (Марокаш, «Севилья» / «Ал-Ҳилол»), Тибо Куртуа (Бельгия, «Реал»), Эдерсон (Бразилия, «Манчестер Сити»), Андре Онана (Камерун, «Интер» / «Манчестер Юнайтед») ва Марк-Андре тер Стеген (Германия, «Барселона») сингари голкиперлар ўрин олди.
ФИФА йилнинг энг яхши мураббийига аталган The Best соврини учун ҳам номзодларни маълум қилди.
2023 йилда соврин учун Пеп Гвардиола («Манчестер Сити»), Симоне Индзаги («Интер»), Эндж Постекоглу («Селтик» / «Тоттенҳэм»), Лучано Спаллетти («Наполи») ва Хави («Барселона») даъвогарлик қилмоқда.
Маълумот учун, ФИФА расмий сайтида The Best соврини учун даъвогарларга мухлислар бугундан овоз беришлари мумкин.
