Кореяда ўзбекистонлик эркак кекса аёлни ёнғиндан қутқариб қолди

Жанубий Кореянинг Янгсан шаҳрида ёнаётган ресторандан Ўзбекистон фуқароси ҳушини йўқотган 69 ёшли аёлни кўтариб олиб чиққан.

Фото: Fire services in South Korea

Кореянинг Янгсан шаҳрида 40 ёшли ўзбекистонлик эркак кекса ёшли аёлни ёнғиндан қутқариб қолди, деб ёзади The Korea Herald.

Ўт ўчириш хизмати маълумотларига кўра, ёнғин душанба куни соат 18:44 лар атрофида кекса эр-хотин бошқарадиган ресторанда содир бўлган. Ёнғин ҳақида портлаш, ойналар синиши овозини эшитган гувоҳлар хабар берган.

Аёлнинг эри ташқарида бўлган ва ёнғин кучайиб кетгани сабабли ичкарига кира олмаган. Ичкарида қолган аёл куйиш жароҳати олган ва ҳушини йўқотган.

Ресторан ёнида яшовчи ўзбекистонлик эркак бино ичига югуриб кириб, аёлни олов ичидан олиб чиққан.

Ёнғин бутун ресторан ва яқин атрофдаги автомобилларга зарар етказган. У соат 19:11 да ўчирилган. Зарар 60,4 минг АҚШ доллари миқдорида баҳоланмоқда.

Жабрланувчининг бутун танасида иккинчи даражали куйиш жароҳатлари борлиги аниқланган, унинг эри ҳам жароҳатлардан даволанмоқда.

Аёлни қутқариб қолган Ўзбекистон фуқароси шиша синиқларидан енгил тан жароҳати олган, унга воқеа жойида биринчи тиббий ёрдам кўрсатилиб, уйига жавоб берилган.

#ёнғин #Корея