Яқин ойлар ичида янада кўпроқ танклар келиши кутилмоқда.
Америка томонидан ишлаб чиқарилган Abrams танкларининг илк партияси шанба куни Украинага етиб келган, деб хабар берган The New York Times 25 сентябр куни АҚШ мудофаа вазирлигидаги манбасига асосланган ҳолда.
Нашр суҳбатдоши гап Украинага ваъда қилган зирҳли техниканинг фақат дастлабки қисми ҳақида кетаётганини айтиб, етказилган танклар сонига аниқлик киритмаган. Танкларнинг қолган қисми яқин ойлар ичида етказиб берилиши кутилмоқда.
Украина президенти Володимир Зеленксий ҳам Abrams танклари келиши бошланганини тасдиқлаган. «Вазир [мудофаа вазири Рустем] Умеровдан яхши янгилик. „Абрамслар“ аллақачон Украинада ва бизнинг бригадаларимизни кучайтиришга тайёрланмоқда. Келишув бажарилгани учун иттифоқчилардан миннатдорман», — дея ёзган президент ижтимоий тармоқлардаги саҳифаларида.
АҚШ жами Abrams танкларидан жами 31 та етказиб беришни режалаштирган, бу миқдор Украина армиясида битта танк баталйонини ташкил этади.
- Украинага Abrams танкларини етказиб бериш режаси ҳақида АҚШда илк бор январда маълум қилинганди. Май ойида Германияда украин ҳарбийларини ушбу танкларни бошқаришга ўргатиш бошланди. Август ойи бошида АҚШ Украинага танкларнинг дастлабки партиясини юбориш учун расман рухсат берди.
- Сентябр ойи бошида Пентагон Украинага Abrams танклари учун кучсизлантирилган уранли снарядлар ҳам етказиб бериши ҳақида эълон қилганди.
