Италияда «Коза Ностра»нинг «катта хўжайини» вафот этди

25 сентябр куни эрталаб Италияда кўп йиллик қидирувлардан сўнг январ ойида қўлга олинган уюшган жиноий ташкилот раҳбари Маттео Мессина Денаро вафот этди. 

Италиянинг ANSA ахборот агентлиги хабарига кўра, жанубий Сицилия оролида фаолият юритувчи «Коза Ностра» мафия гуруҳининг «катта хўжайини» бўлган ва қатор қотилликлар ташкилотчиси сифатида танилган Денаро Аквила шаҳридаги қамоқхона касалхонасида вафот этган. У бу ерда йўғон ичак саратонидан даволанаётган эди. 

Кўп йиллар давомида қочқинда яшаган Денаро 16 январ куни жанубий Палермо шаҳрида тиббий ёрдам сўраган хусусий клиникада техник кузатув натижасида қўлга олинган.

Маттео Мессина Денаронинг ҳибсга олиниши мамлакатда катта шов-шувга сабаб бўлди.

Қўлга олинганидан кейин у Аквила шаҳридаги қаттиқ режимли қамоқхонага жойлаштирилди. Қамоқхонада у саратон касаллигидан даволанган касалхона мавжуд.

Кейинроқ Денаро адлия тизими билан ҳамкорлик қилмаётгани айтилди. 

Матбуотда маълум вақтдан бери саратон касаллигидан даволанаётган Денаро дам олиш кунлари «чуқур комага тушиб қолгани» тўғрисида хабарлар пайдо бўлди. 

Денаро сўнгги 30 йил ичида йирик жиноий воқеалар, жумладан, мафияга қарши кураши туфайли мамлакат рамзига айланган машҳур судялар Жованни Фалкон ва Паоло Борселлинонинг ўлдирилишида айбланмоқда. Улар 1992 йилда мафия ҳужумидан қочиб қутула олмаган. Тергов маълумотларига кўра, Денаро 1993 йилда Милан, Флоренция ва Римдаги терактларда ҳам иштирок этган.