Ҳатто VIP тарифлар ҳам бўлган: Италиянинг Ўзбекистондаги собиқ элчиси визаларни қандай пуллаган?

Дипломат Пиэргабриеле Пападиa ва унинг ёрдамчиси Татяна Таракановалар Шенген визасини пуллаганликда айбланиб, қамоққа олинган. Бор-йўғи 1 йил ишлаган собиқ элчи камида 95 нафар Россия фуқароларига ноқонуний равишда виза беришга улгурган. Бизнес схема ичига Москвадаги сайёҳлик фирмалари ҳам киради. Собиқ элчи текширув вақтида “дудуқланиб қолган”.

Пул эвазига Шенген визаси, тўлов қиймати битта виза эвазига 4 минг евродан 16 минг еврогача. Асосий харидорлар эса албатта руслар, виза олиш учун элчихонага келиш ҳам шарт эмас, VIP тарифлар тақдим этилади. Италиянинг Ўзбекистондаги собиқ элчиси Пиэргабриэле Пападиа дe Боттини ўз ёрдамчиси билан ноқонуний бизнес схемаси яратиб, Шенген визаларини сотишда айбланмоқда ҳамда ҳозир уларнинг иккаласи Римда қамоққа олинган.

2024 йилнинг 2 декабрь санасида 56 ёшли Пиэргабриэле Пападиа дe Боттини Италиянинг Ўзбекистондаги Тошкентда жойлашган элчихонасига раҳбар бўлди. Бу билан у виза идораси бошқарувини ҳам қўлга олди. Айнан ўша вақтда, яъни декабрь ойининг ўрталарида жаноб элчи Болгарияда яшовчи, Италия фуқаролигига ҳам эга 53 ёшли россиялик Татяна Таракановани ҳам жамоаси таркибига қўшиб олади.

Маълумот сифатида айтиш керакки, Тараканова ва Пападиа илгари Москвадаги Италия консуллигида бирга ишлашган. Жуфтлик элчихонадан туриб, виза сотганликда айбланмоқда. Дипломат аллақачон ҳибсда, Рим полицияси жуфтликни қўлга олган.

Италия полицияси собиқ элчини Ўзбекистондаги мамлакат элчихонасидан ноқонуний Шенген визаси схемасини бошқарганликда айблаб ҳибсга олди. Бу ҳақида итальян матбуоти ўтган ҳафта жума куни хабар чиқарди.

La Repubblica газетасининг ёзишича, Рим прокуратураси Италиянинг Тошкентдаги собиқ элчиси Пиэргабриэле Пападиа де Боттини ва унинг шериги Татяна Таракановани ноқонуний иммиграцияни осонлаштиришга ёрдам берганлик ва расмий вазифаларини суиистеъмол қилиш билан боғлиқ коррупцияга алоқадорлик айбловлари бўйича тергов қилмоқда.

Италия молия полицияси Римдаги терговчи судья Аннализа Марзано буйруғи билан элчи ва унинг ўнг қўлини эҳтиёт чораси сифатида қамоққа олди.

Терговчиларнинг таъкидлашича, собиқ элчи ва Татяна Шенген ҳудудига кириш талабларига жавоб бермайдиган Россия фуқароларига 4000 евродан 16000 еврогача тўловлар эвазига узоқ муддатли сайёҳлик визаларини бериш тизимини яратган.

Терговчиларга шунингдек, собиқ элчининг мақсади пул ишлаш бўлганини гапирмоқда. Улар элчи оғзидан пул керак деб ёзилган аудиосуҳбатларга эга эканини билдирмоқда.

Кейинчалик Пападиа терговчиларга бу ёзувларни "контекстга мослаштириш кераклигини" айтган.

Терговчилар айни дам тахминан яна 400 та виза ҳужжатларини кўриб чиқмоқда ва уларнинг ҳаммаси Пападиа билан боғлиқ. Шунингдек, тахминан 3 миллион еврога баҳоланган активлар ҳам текширувдан ўтяпти.

Lа Repubbliса нашрининг ёзишича, дипломат ва унинг ёрдамчиси виза олиш учун махфий VIP тарифларини ҳам жорий қилган. Визалар камида 1 йилдан 3 йилгача муддатга берилган.

Тизим яхши йўлга қўйилган эди. Унда Москвада жойлашган учта сайёҳлик агентлиги: Happy Travel, Visa4you ва Park Lane иштирок этган, уларнинг барчаси бир хил манзилда расман рўйхатдан ўтказилган. Камида 95 нафар Россия фуқароси ушбу агентликларга мурожаат қилган ва кейинчалик зарур виза талабларига жавоб бермасдан, масалан, консуллик округида яшаш ҳуқуқисиз, яъни Ўзбекистонда яшамасдан туриб ёки ариза берувчи томонидан имзоланган ҳужжатларсиз, консулликда жисмонан ҳозир бўлмасдан визаларни олиб, Италияга кирган.

Аризалар агентликлар орқали юборилган ва ҳозиргача терговлар шуни кўрсатадики, баъзи сўровлар гумондорга Телеграм орқали ҳам юборилган: ҳатто рўйхатга ҳам олинмаган.

Хўш, прокуратура бундан қандай хабар топди? Маълум бўлишича, ташқи ишлар ва халқаро ҳамкорлик вазирлигининг Бош инспекцияси 2025 йил 23 июлда элчихонага келади. Текширувчилар миссияси қўлига тушган виза аризаларида айнан элчи Пападианинг бевосита айби билан йўл қўйилган қонунбузарликлар аниқланади. Элчи ўша аризачилар исми устига ОК, кейин эса ўз исми бош ҳарфларини ёзиб чиққани маълум бўлади.

Вазирлик текшируви давомида кўриб чиқилган 92 та аризадан 81 тасида виза сўраган Россия фуқароларининг исмлари элчихона кириш реестрида йўқ бўлиб чиқади, бу уларнинг ҳеч қачон ўзларини шахсан тақдим этмаганликларидан далолат беради.

Lа Repubbliса нашрининг қўшимча қилишича, Пападиа билан 2014 йилдан бери таниш бўлган Visa Consord Travel компанияси 2025 йилнинг январь-июнь ойларида Тараканованинг Болгариядаги банк ҳисоб рақамига 23 600 евро пулларни ўтказиб беради.

Ҳа, дипломатиядаги энг олий ранг эгаси бўлишига қарамай, элчилар иштирокидаги жиноятлар тез-тез учраб туради. Масалан, 2023 йилда АҚШнинг Боливиядаги элчиси Кубага ишлаган агент сифатида қўлга туширилган эди. Бу АҚШ дипломатияси тарихидаги энг катта жосуслик ишларидан бири бўлиб қолмоқда.

Ёки португалиялик дипломат Виктор Мануэл 2024 йилда одам савдоси ҳамда ноқонуний миграция схемалари бўйича жиноий ишда терговга чақирилган.

Ҳиндистонлик дипломат Рави Тҳапар эса Европада одам савдоси ҳамда эксплуатация билан боғлиқ жиноятларда айбланган, бу катта можарони юзага келтирган. Бундай мисолларни давомли келтириш мумкин.

Вазият юзасидан муносабат олиш учун Kun.uz Италиянинг Ўзбекистондаги элчихонаси билан боғланди. Жамоатчилик билан алоқалар департаменти иш терговда экани ва судга оширилиши сабаб ҳозир бу дипломатик идора бирор нима дейишга ҳақли эмаслигини билдирди.