Хитойнинг Amer International компанияси Ўзбекистонда минтақавий офисини очади

Компания юқори технологиялар, электроника, яримўтказгичлар саноати, кончилик ва қайта ишлаш тармоқларидаги лойиҳалар билан шуғулланади.

Ўзбекистон президенти Шавкат Мирзиёев 17 октябр куни Пекин шаҳрига амалий ташриф доирасида Хитойнинг Amer International саноат ҳолдинги раиси Ван Вэнйин билан учрашди.

Қайд қилинишича, Amer International юқори технологиялар, электроника, яримўтказгичлар саноати, кончилик ва қайта ишлаш тармоқларидаги лойиҳалар билан шуғулланади. Компания Fortune 500 глобал рейтингига кирган. Хитойда ва унинг ташқарисида умумий қиймати 60 миллиард доллардан зиёд бўлган лойиҳаларни амалга оширмоқда.

Ван Вэнйин Ўзбекистонга Марказий Осиё минтақасидаги бизнесининг бош йўналиши сифатида қараётгани таъкидланмоқда. Мисни қайта ишлаш ва ундан инновацион ва харидоргир маҳсулотлар, шу жумладан электротехника, электромобиллар учун аккумулятор батареялари, микроэлектроника ва яримўтказгичлар ишлаб чиқариш бўйича истиқболли лойиҳалар муҳокама қилинди.

Amer International компанияси раиси Хорижий инвесторлар кенгаши фаолиятида иштирок этиши, Ўзбекистонда минтақавий офис очиш ҳамда қўшма инновацион лойиҳаларни тезлаштириш бўйича «йўл харитаси»ни қабул қилиш юзасидан келишувга эришилди.