Аргентина президенти иккинчи турда сайланадиган бўлди

Аргентинада «Ватан учун иттифоқ» ҳукмрон коалицияси вакили, иқтисодиёт вазири Серхио Массава «Озодлик келяпти» алянси вакили либертар депутат Хавер Милей президентлик сайловларининг иккинчи босқичига ўтди. Мамлакат Миллий сайлов палатаси 22 октябр куни улар мос равишда 36,6 фоиз ва 30 фоиздан сал кўпроқ овоз олганини маълум қилди. 

Учинчи ўринни «Ўзгариш учун биргаликда» энг йирик мухолифат коалициясидан номзод, Аргентинанинг собиқ хавфсизлик вазири Патрисия Булрич 23,8 фоиз овоз билан эгаллаб турибди. Кордова провинцияси губернатори Хуан Скяретти 6,81 фоиз натижа билан ундан анча орқада. Ўта сўл сиёсатчи Мириам Брегманни сайловчиларнинг атиги 2,7 фоизи қўллаб-қувватлаган. 

Биринчи босқичда ғалаба қозониш учун энг яқин рақибдан фарқ камида 10 фоиз бўлган тақдирда ғолиб 45 фоиздан кўпроқ ёки 40 фоиз овоз олиши керак эди. Номзодларнинг ҳеч бири бундай натижага эриша олмагани сабабли, 19 ноябр куни Аргентинада сайловнинг иккинчи босқичи бўлиб ўтади. 

Аргентина иқтисодиётининг оғир аҳволи 

Аргентина анча вақтдан бери бошдан кечираётган оғир иқтисодий инқироз шароитида сайловда иштирок этиш учун мамлакатдаги сайлов ҳуқуқига эга 35 миллиондан ортиқ киши чақирилди. Улар парламентни қисман алмаштириш учун ҳам овоз бериши мумкин эди. Лотин Америкасининг учинчи йирик иқтисодиётида инфляция сентябр ойида ўтган йилнинг шу ойига нисбатан 138 фоизни ташкил этди. Аргентина Халқаро валюта жамғармасидан катта қарзга эга ва мамлакатнинг 47 миллионга яқин аҳолиси учдан биридан кўпроғи қашшоқлик чегарасида яшайди. 

51 ёшли иқтисодиёт вазири Масса марказий сўл ҳукумат лагеридан номзод бўлди. Ўз дастурига кўра, сиёсатчи асосий эътиборни миллий саноат ва нефт-газ соҳасини ривожлантиришга қаратмоқчи, бу эса мамлакат иқтисодиётига хорижий инвестициялар оқимини кўпайтириши мумкин.

Шу билан бирга, ўзини «анархо-капиталист» деб таърифлайдиган 53 ёшли Милей сайловолди сўровларида 35 фоиздан сал камроқ маъқуллаш рейтинги билан пешқадам эди. Сайлов кампанияси пайтида у мамлакатни «паразит сиёсатчилар кастаси»дан тозалашни хоҳлаётганини айтди. Аввалроқ Милей Хитой, Бразилия ва Россия билан алоқаларни ривожлантириш ниятида эмаслигини, бу давлатлар сиёсатига қўшилмаслигини бир неча бор таъкидлаган, бироқ у хусусий бизнеснинг улар билан бизнес юритишига тўсқинлик қилмаслигини айтган.