Қозоғистонда собиқ адлия вазири 2 ойга ҳибсга олинди

Остона тергов суди Қозоғистон собиқ адлия вазири, икки кун аввал ушланган 46 ёшли Марат Бекетаевни икки ойга ҳибсга олишга рухсат берди. Суд матбуот хизмати гумонланувчига нисбатан шундай эҳтиёт чораси қўллангани ҳақида 23 октябр, душанба куни маълум қилди.

Собиқ амалдор мансаб ваколатини суиистеъмол қилганликда гумонланмоқда. Текширув шуни кўрсатдики, Бекетаев кераксиз хизматлар кўрсатиш бўйича йиллик шартномалар тузиш орқали шуъба компания манфаатларини ҳимоя қилган ва бу билан «давлатга катта зарар етказган». Қозоғистон Коррупцияга қарши кураш хизмати ўтган шанба куни собиқ вазир ушлангани ҳақида маълум қилган, бироқ қўлга олинган шахснинг исми ошкор этилмаган.

Собиқ амалдор янги ҳукуматга керак эмас

Қозоқ матбуотига кўра, Марат Бекетаев мамлакатни тарк этмаслик ҳақида ёзма мажбурият олган, бироқ гўёки Қозоғистонни яширинча тарк этишга уринган. Қайд этилишича, 21 октябр куни собиқ амалдор Истанбулга йўл олиб, «узоқроққа - Лондонга» учиб кетмоқчи бўлган, бироқ бу маълумотнинг расмий тасдиғи йўқ.

Бекетаев Қозоғистон Адлия вазирлигини 2016 йилдан 2022 йил бошигача бошқарган ва 2022 йил январида Қозоғистонда рўй берган тартибсизликлар ортидан, расмий маълумотларга кўра, 238 киши ҳалок бўлганидан кейин лавозимидан четлаштирилган юқори лавозимли амалдорлардан бири бўлган. Бекетаев вазирликдан кетгач, бош вазир маслаҳатчиси этиб тайинланган ва ўтган йилнинг декабр ойида ушбу лавозимдан озод қилинган эди.

Бекетаев ишдан бўшатилганидан сўнг Қозоғистон ОАВ унинг амалдаги давлат раҳбари Қосим-Жўмарт Тўқаев томонидан собиқ президент Нурсултон Назарбоевга яқин амалдор сифатида кўрилгани ҳақида ёзган. 2022 йил январ ойида Қозоғистон пойтахти ва йирик шаҳарларида норозилик тартибсизликлар ҳамда намойишчилар, полиция ва армия ўртасидаги тўқнашувларга айланиб кетди. Шундан сўнг, собиқ президент ўз лавозимини йўқотди. Назарбоев, шунингдек, ўзига тегишли кўчмас мулк дахлсизлиги, қариндошлари эса шахсий дахлсизлик ҳуқуқидан маҳрум бўлди.