Россияда чет элликлар билан сохта никоҳга қарши чоралар жорий этилади

Россияда хорижликлар учун мигрант мақомини олиш мақсадида сохта никоҳдан фойдаланиш имконияти чекланмоқда. Ҳукумат таклифига кўра, соддалаштирилган тартибда вақтинчалик яшаш учун рухсатномани никоҳда икки йил яшагандан кейин бериш жорий қилинмоқда.

Шу билан бирга, Россия ҳукумати агар никоҳ суд томонидан ҳақиқий эмас деб топилса, у ҳолда аввалроқ берилган вақтинчалик «прописка» ва яшаш учун рухсатномани ҳам бекор қилишни таклиф этган. Шу билан бирга, агар никоҳ ўзаро келишувга кўра бекор қилинган тақдирда ҳам шундай йўл тутиш кўзда тутилган.

Сенаторлар, шунингдек, агар чет эл фуқароси Россияда доимий яшовчи фарзанди бўлса, лекин суд қарори билан ота-оналик ҳуқуқидан маҳрум қилинса, яшаш учун рухсатномани ҳам бекор қилишни таклиф этган.

Қайд қилинишича, Россияда 2022 йилда 400 га яқин никоҳ сохта деб тан олинган. Интернетдаги рекламаларга қараганда, фуқароликни олиш мақсадида турмуш қуриш «нархи» 50 мингдан 300 минг рублгача туради.

Ҳукумат маълумотига кўра, 2022 йилда Тожикистон фуқаролари «сохта никоҳлардан» энг кўп фойдаланган.