Блинкеннинг ташрифи вақтида Эрдўған Анқарада бўлмайди

Туркия президенти Ражаб Тоййиб Эрдўған Туркияга ташриф буюришини эълон қилган АҚШ давлат котиби Энтони Блинкеннинг ташрифи чоғида Анқарада бўлмаслигини билдирди. У режалаштирилганидек мамлакат бўйлаб сафарини давом эттиради, деб хабар берди Туркия президенти 5 ноябр, якшанба куни Қора денгиз бўйидаги Ризе шаҳрида сўзлаган нутқида. Эрдўғаннинг сўзларига кўра, у минтақадаги урбанизацияни ўрганиш ниятида.

Блинкен аввалроқ Исроилга кутилмаган ташрифни амалга оширди, кейин эса Рамаллоҳга сафар қилди, бу 7 октябрдан кейин Фаластин ҳудудларига биринчи ташриф. 5 ноябр куни кечқурун давлат котиби Туркияга учиб келди ва у ерда «Яқин Шарқда барқарор тинчликка эришиш» мумкин бўлган йўлларни, жумладан «Фаластин давлатини яратиш»ни, Америка ташқи сиёсатини муҳокама қилиш ниятида. Туркия ташқи ишлар вазири Хоқон Фидан билан музокаралар 6 ноябрга белгиланган. Эрдўғаннинг баёнотларидан олдин Блинкенга яқин шахслар Туркия президенти билан эҳтимолий учрашув ҳақида ижобий умидларини билдирганди.

Намойишчилар Инжирлик базасига киришга ҳаракат қилди

Айни пайтда, намойишчилар Америка ҳаво кучлари жойлашган Туркиядаги Инжирлик ҳаво базасига киришга ҳаракат қилган. Полиция ҳаво базаси яқинида Исроил ва АҚШга қарши намойиш ўтказган фаолларга қарши кўздан ёш оқизувчи газ ва сув пуркагичлардан фойдаланган. IHA агентлиги Фаластин ва Туркия байроқларини ушлаб турган намойишчиларнинг тарқатиб юборилгани акс этган видеони чоп этди. Намойишчилар авиабазага 5 ноябр куни эрталаб Истанбулдан етиб келган.

Бир кун аввал Эрдўған Исроил бош вазири Бинямин Нетаняҳу билан алоқани давом эттиришнинг иложи йўқлигини маълум қилган эди. «Нетаняҳу энди биз гаплашадиган одам эмас. Биз уни ўчириб ташладик», деди у. Бундан ташқари, Анқара Туркия ўз элчисини Исроилдан «маслаҳатлашувлар» учун чақириб олаётганини айтди. Шу билан бирга, Эрдўғаннинг матбуот хизмати Туркия шунга қарамай, Исроил билан дипломатик алоқаларни узиш ниятида эмаслигини тушунтирди. Бир ҳафта олдин Исроил ҳукумати Туркиянинг Фаластин-Исроил можароси ҳақидаги риторикаси муносабати билан Анқара билан муносабатларини «қайта кўриб чиқаётганини» билдирганди.

Исроил-Фаластин можароси

7 октябр куни эрталаб ҲАМАСнинг ҳарбий қаноти - «Иззаддин ал-Қассам бригадалари» Исроилга қарши «Ал-Ақсо тўфони» операцияси бошланганини эълон қилди. Ғазо секторидан Исроил томон минглаб ракеталар отилди, қуролли гуруҳлар Исроил аҳоли пунктларига кирди.

ҲАМАСнинг билдиришича, операция босиб олинган Шарқий Қуддусдаги Ал-Ақсо масжидига бостириб кириш ва исроиллик муҳожирларнинг фаластинликларга нисбатан зўравонлиги кучайиб бораётганига жавобан амалга оширилган. 

Бунга жавобан Исроил армияси Ғазо секторида ҲАМАСга қарши ўнлаб қирувчи самолётлардан фойдаланган ҳолда «Темир қиличлар» операцияси бошланганини эълон қилди. 

Исроил-Фаластин можароси авж олгандан бери 10 мингга яқин фаластинлик ҳалок бўлди. Исроилда қурбонлар сони 1400 дан ошади. Ғазонинг 2,3 миллион аҳолиси Исроилнинг ҳаводан оммавий бомбардимон қилиши ва эксклавнинг тўлиқ блокадаси туфайли озиқ-овқат, сув ва дори-дармонлар танқислигидан азият чекмоқда.