Франция заводи «Росатом»га бойитилган уран етказиб беради

Экологик гуруҳлар вакилларининг фикрича, «Росатом» Украинадаги уруш доирасида Европа Иттифоқидан олинган бойитилган урандан фойдаланиши мумкин.

Фото: Picture Alliance

Франциянинг Framatome компаниясига тегишли Германиянинг Линген шаҳридаги ёнилғи элементлари ишлаб чиқариш бўйича завод бойитилган уранни Россияга жўнатмоқчи. Бу ҳақда 7 ноябр, сешанба куни Ausgestrahlt, Bündnis AgiEL, SOFA ва Россиянинг «Экозащита!» экологик гуруҳлари маълум қилди. Уларнинг фикрича, бу таъминот Европа санкцияларини четлаб ўтади.

Экологик ташкилотлар томонидан чоп этилган пресс-релизда таъкидланишича, уран якуний олувчиси Россиянинг «Росатом» давлат атом компаниясига тегишли «Машиностроителний завод» бўлиши керак. Экологлар таъкидлашича, «Росатом» Украинадаги урушда фаол иштирок этмоқда, шунинг учун давлат корпорацияси томонидан бойитилган уранни ўз ичига олган икки томонлама мақсадли маҳсулотлар ҳарбий фойдаланишга мўлжалланган бўлиши мумкин ва Европа Иттифоқи санкциялари билан тақиқланган.

Шу муносабат билан, экологик гуруҳлар вакиллари Германия Федерал атроф-муҳит вазирлигидан Россияга уран етказиб бериш бўйича «ноқонуний» аризани дарҳол рад этишни ва Лингендаги ёнилғи элементлари заводини ёпишни талаб қилди.

Айни пайтда Россияга бойитилган уранни етказиб бериш ва Россиядан олиб чиқишга расмий тақиқ йўқ. Бироқ 2022 йил 7 апрелда Европарламент Россиядан нефт, кўмир, газ ва ядро ёнилғиси импортига чекловларни узайтириш зарурлиги тўғрисида резолюция қабул қилди. Европа парламенти, шунингдек, «мавжуд ва янги ядровий лойиҳалар бўйича Россия компаниялари билан ҳамкорликни тўхтатишга» чақирди.