НАТО F-16'ни Киевга топшириш жараёнидаги ўзгаришни олқишлади

НАТО бош котиби Йенс Столтенберг Ғарб қирувчи самолётларини Украинага ўтказиш жараёнидаги олға силжишдан мамнун. 8 ноябр, чоршанба куни у Нидерландиядан биринчи F-16 самолёти украиналик учувчиларни тайёрлаш учун Руминияга етказилганини олқишлади. Брюсселда Венгрия президенти Каталин Новак билан ўтказган қўшма матбуот анжуманида у иттифоқдошлар Россиядан ҳимояланаётган Украина учун мисли кўрилмаган ёрдам кўрсатишда давом этишини таъкидлади.

Шу билан бирга, Столтенберг Киевга ҳарбий ёрдамни камайтириш хавфи ҳақида огоҳлантирди. Унинг сўзларига кўра, Россия ўзини сабрлироқ деб билиб, Ғарбнинг Украинани қўллаб-қувватлаш истаги қачонлардир тугашига ишонади. «Биз унга нотўғри фикрда эканини исботлашимиз керак», дейди алянс раҳбари. Бу Украинанинг омон қолиши учун ҳам, НАТО мамлакатлари хавфсизлиги учун ҳам муҳим, дейди у. 

Нидерландия Руминиядаги ўқув марказига бешта F-16 самолётини юборди

Бир кун олдин Нидерландия Украинага топшириш учун мўлжалланган дастлабки бешта F-16 қирувчи самолётини Руминиядаги ўқув марказига жўнатди. Украина Қуролли кучлари улардан қачон жанговар фойдаланиши мумкинлиги ҳозирча ноаниқ. Учувчиларни тайёрлаш камида олти ой давом этиши кутилмоқда. Нидерландия Мудофаа вазирлиги маълумотларига кўра, ҳарбий самолётлар машғулотлар жараёнида НАТО ҳаво ҳудудини тарк этмайди. 

Дания, Нидерландия ва Норвегия Украинага ўнлаб F-16 қирувчи самолётларини тақдим этишга ваъда берган. Бундан ташқари, бир қанча ғарб давлатлари украиналик учувчилар ва ушбу машиналарга техник хизмат кўрсатиш бўйича мутахассисларни тайёрламоқда. Lockheed Martin Америка ишлаб чиқарувчиси ҳам таълим ва техник ёрдам кўрсатади.