Инвестициялар вазирига янги ўринбосар тайинланди

«Ўзметкомбинат» ижрочи директори вазир ўринбосарига айланди.

Фото: Ўзметкомбинат

«Ўзбекистон металлургия комбинати» АЖ бошқарув раисининг биринчи ўринбосари Дилшод Турсунқулович Аҳмедов инвестициялар, саноат ва савдо вазирининг ўринбосари этиб тайинланди.

Дилшод Аҳмедов 1972 йилда туғилган, И.М. Губкин номидаги Россия давлат нефт ва газ университетини тамомлаган. «Сколково» Москва бошқарув мактабида ўқиган. Ўзбекистон ва Россияда ишлаб чиқаришни ташкил этиш ва саноат корхоналари активларини бошқаришда тажрибага эга.

У 2021 йил январидан ҳозирга қадар «Ўзбекистон металлургия комбинати» АЖ бошқарув раиси биринчи ўринбосари — ижрочи директор лавозимида ишлаб келаётганди.

Маълумот учун, инвестициялар, саноат ва савдо вазирлигига 2022 йил декабридан буён Лазиз Қудратов раҳбарлик қилиб келмоқда.

Унда ҳозиргача уч нафар ўринбосар бор эди — Нозимжон Холмуродов, Хуррам Тешабоев ва Бадриддин Абидов.

Тайёрлаган: Азиз Қаршиев

#тайинлов #Ўзметкомбинат #Дилшод Аҳмедов