Швейцария ва Украина глобал тинчлик саммитини ўтказади

Швейцарияда Украинадаги вазиятни тинч йўл билан тартибга солиш бўйича бешинчи конференция ташкил этилаётгани ҳақида президентлар Виола Амҳерд ва Володимир Зеленский Бернда маълум қилди. Унга Украина ҳудудий яхлитлигини қўллаб-қувватловчи давлатлар таклиф этилади.

Фото: Picture Alliance

Швейцария ва Украина глобал тинчлик саммитини ташкил қилишни режалаштирмоқда. Бу ҳақда икки давлат президентлари Виола Амҳерд ва Володимир Зеленский 15 январ, душанба куни Бернда маълум қилди. Томонлар яқин вақт ичида ушбу тадбирга тайёргарликни бошлаш ниятида. Саммитнинг аниқ санаси ҳозирча маълум қилинмаган.

Украина раҳбари учрашувга Украинага ҳужум қилишда давом этаётган Россияни таклиф қилиш режаси йўқлигини аниқ айтди. Унга Украина ҳудудий яхлитлигини қўллаб-қувватловчи барча давлатлар таклиф этилади, деди у. Зеленский Telegram’да ҳар икки давлат жамоалари 16 январ куни Швейцарияда бўлиб ўтадиган глобал тинчлик саммитига тайёргарликни бошлашини айтди.

Украина бўйича бешинчи конференция

Швейцариядаги тинчлик саммити 2023 йилда Дания, Саудия Арабистони ва Малтада, шунингдек, 2024 йил 14 январда Давосда бўлиб ўтган Украинада тинчлик ўрнатиш бўйича тўртта конференцияга ўхшаш форматда ўтказилади.

Давос конференциясида 83 давлат ва халқаро ташкилот вакиллари иштирок этди. Унда Украинадаги вазиятни тинч йўл билан тартибга солиш бўйича Киев расмийлари томонидан тузилган ўн бандлик режада келтирилган асосий талаблар муҳокама қилинди. Хусусан, Россия қўшинларини Украина бутун ҳудудидан олиб чиқиб кетиш, россиялик ҳарбий жиноятчиларни жазолаш ва Россия томонидан етказилган зарар учун товон тўлаш кўзда тутилган. Хитой конференцияда иштирок этмади, аммо президент Зеленскийнинг идораси Пекинни тинчлик жараёнига жалб қилиш истагини билдирган.

Берндан Володимир Зеленский Давосга келади ва у ерда Жаҳон иқтисодий форумида иштирок этади.