Володимир Зеленский халқаро ҳамкорларни Москвага босимни камайтирмасликка чақирди. Давосдаги форум доирасида Украина президенти НАТО бош котиби ва йирик инвесторлар билан учрашди.
Украина президенти Володимир Зеленский ғарбни Россия билан урушда ўз мамлакатини қўллаб-қувватлашда бирдамлик кўрсатишга чақирди. Россияга қарши туриш учун Украинага кўпроқ ёрдам керак, деди у 16 январ, сешанба куни Давосдаги Жаҳон иқтисодий форумида.
Украина раҳбари сўзларига кўра, ғарбнинг Россия можарони янада кучайтириши мумкинлигидан хавотирлари туфайли Украина унга қарши курашда вақт йўқотди. У халқаро ҳамкорларни Москвага босимни пасайтирмасликка чақирди. «Унга босимнинг ҳар қандай қисқариши урушни узайтиради», деб таъкидлади Зеленский ва шундай ишонч билдирди: «Уруш адолатли тинчлик билан тугайди».
Шу билан бирга, Зеленскийнинг сўзларига кўра, қасос олиш эмас, адолатга эришиш муҳим бўлган Украина халқи урушни бошлаб берган Россия раҳбариятини кечирмайди. «Вақт уларнинг фойдасига ишламаяпти. Бу дунёда улар ҳам, уларнинг болалари ҳам хавфсиз бўлмайди, - дейди Украина раҳбари. - Улар жавобгарликка тортилади».
Зеленский Россия раҳбариятини айблаб чиқди
Зеленский Россия раҳбариятини «оммавий депортациялар, вайрон қилинган шаҳар ва қишлоқлар ҳамда уруш ҳеч қачон тугамаслиги мумкинлиги ҳақидаги даҳшатли туйғуни нормаллаштиришга уринишда» айблади. Зеленскийнинг сўзларига кўра, улар Украинадаги музлатилган можародан қониқмайди. 2014 йилдан кейин Донбассдаги урушни тўхтатишга уринишлар бўлганини эслатиб, у «Россия раҳбарияти музлатилган нарсадан қониқмайди», деди. Володимир Зеленский Кремлдагиларнинг инсоний фазилатларини инкор этиб, улар «ўзгармаслигини» таъкидлади ҳамда «буни фақат одамлар қила олиши» мумкинлигини тушунтирди.
Украина президентининг сўзларига кўра, Москвага қарши санкциялар зарур, чунки «улар пулни ҳамма нарсадан кўра яхши кўради»: «Улар қанча кўп пул йўқотса, бу олигархларга шунчалик қаттиқ таъсир қилади».
Зеленский Давосда Столтенберг ва йирик инвесторлар билан учрашди
Давосдаги форум доирасида Зеленский НАТО бош котиби Йенс Столтенберг билан музокаралар ўтказди, шунингдек, йирик инвесторлар иштирокидаги учрашувда қатнашди. Унинг сўзларига кўра, Столтенберг билан учрашувда «кўплаб муҳим масалалар» муҳокама қилинган: «жанг майдонидаги вазият, давлат мудофаа эҳтиёжлари, Украина ҳаво ҳужумидан мудофаа тизимини янада мустаҳкамлаш, НАТОнинг Вашингтондаги навбатдаги саммитига тайёргарлик, Украина НАТОга киргунга қадар амалда бўладиган G7 декларацияси доирасидаги икки томонлама хавфсизлик келишувлари бўйича ҳамкорлар билан ишлаш».
«Йирик бизнес етакчилари – Украина» учрашуви чоғида, хусусан, Украинанинг иқтисодий кўрсаткичлари муҳокама қилинди. «У 2023 йилда 5 фоиздан ошган Украина иқтисодий ўсиши ва 2024 йилга ялпи ички маҳсулот ўсиши бўйича оптимистик прогнозлар ҳақида гапирди. Одамларни Украинага сармоя киритишга ва уни қайта тиклашда иштирок этишга таклиф қилди. Бу ерда бўлиш, мустаҳкамлаш жуда муҳим. Украинага сармоя киритиб, иқтисодиётимизни қўллаб-қувватланг», — деб ёзди Зеленский Telegram’да.
