Германия Киевга янги ҳарбий ёрдам пакетини топширди

Германия ҳукумати ўзини Россия ҳужумидан ҳимоя қилаётган Украинага навбатдаги ҳарбий ёрдам пакетини ўтказишини эълон қилди. Унга Leopard 1 танклари учун ўқ-дорилар (сони номаълум), 8 та зирҳли транспорт воситаси, портловчи ўқ-дориларни йўқ қилиш ускуналари (Бундесвер ва саноат захираларидан), 20 та Marder пиёда жанговар машиналари, 15 та Gepard ўзиюрар зенит қурилмалари ва 149 та RQ-35 Heidrun разведкачи дронлари киради. Бу ҳақда 16 январ, сешанба куни федерал ҳукумат расмий сайтида хабар берилган. 

Бундан ташқари, пакетга 3 та автомобил, 40 та Mercedes-Benz Zetros ёқилғи қуйиш транспорти, 20 та Zetros музлатгичи, 50 та SatCom алоқа терминали, 5 та чегара қўриқлаш машинаси, 2500 та ҳимоя дубулғалари ва 2000 та ёритгичлар киради. 

Баёнотда қайд этилганидек, Германиядан Украинага ҳарбий ёрдамнинг умумий ҳажми 2023 йилда 5,4 миллиард еврони, 2022 йилда эса 2 миллиард еврони ташкил қилган. Келгуси йилларда Германия 10,5 миллиард евро миқдоридаги ёрдамни ўтказиш мажбуриятини олди, дея хабар беради Берлин. 

Германия Украинага ҳарбий ёрдамни деярли икки баравар оширади

Бир кун аввал Германия Украинага ҳарбий ёрдам учун 2024 йилда олдиндан режалаштирилганидек 4 миллиард эмас, балки 7 миллиард евродан кўпроқ маблағ ажратиши маълум бўлди. Бу ҳақда Германия канцлери Олаф Шолц АҚШ президенти Жо Байден билан телефон орқали суҳбатда маълум қилди. Германия ва Қўшма Штатлар раҳбарлари ўз суҳбатларида «Украина ўзини Россиядан ҳимоя қилишда давом этар экан, унга молиявий, ҳарбий ва гуманитар ёрдам кўрсатиш зарурлигини таъкидлади», деди Германия ҳукумати вакили Штеффен Хебештрайт.

Бу икки баравар ошириш туфайли Германия ҳам мудофаа харажатларини ЯИМнинг 2,1 фоизигача оширади ва шу тариқа НАТО талабини қондиради. Қўшма Штатлар ва Германия Россиянинг кенг кўламли ҳужуми бошланишидан бери Украинага кўрсатилаётган ёрдам кўрсаткичлари бўйича мутлақ етакчилик қилмоқда. Германия, бошқа нарсалар қаторида, Киевга Leopard танклари, IRIS-T SLM ҳаво мудофаа тизимлари ва улар учун ракеталарни етказиб берди. 

Германиянинг Килдаги жаҳон иқтисодиёти институти маълумотларига кўра, Қўшма Штатлар 2023 йил охиригача Украинага ҳарбий ёрдам кўрсатиш учун 44 миллиард евро ажратган. Бироқ 2024 йил бошида Конгрессда республикачилар ва демократлар ўртасидаги келишмовчиликлар туфайли Вашингтоннинг Киевга ҳарбий ёрдами вақтинча тўхтатилган эди. 6 январ куни The New York Times газетаси Қўшма Штатлар яқин орада Украинага Patriot ҳаво мудофаа тизими учун ракеталарни етказиб беришни тўхтатиши мумкинлиги ҳақида хабар берди. 

https://www.dw.com/ru/germania-peredala-kievu-novyj-paket-voennoj-pomosi/a-68015941