Россияда мигрантнинг рақамли профилини яратиш режалаштирилмоқда

Бунга эришиш учун ҳар бир чет эл фуқароси учун турли идоравий тизимлардаги миграция рўйхатга олиш маълумотларини бирлаштириш режалаштирилган.

Фото: Сергей Ведяшкин

Россияга кирувчи хорижий фуқаронинг рақамли профили 2024 йил 10 декабргача яратилиши керак. Худди шу санага қадар Москва аэропортлари орқали Россияга кирган хорижликларнинг биометрик маълумотларини йиғиш бўйича эксперимент якунланиши лозим. Бу ҳақда 2024-2025 йилларда Давлат миграция сиёсати концепциясини амалга ошириш бўйича чора-тадбирлар режасида белгиланган, деб ёзди Interfax.

Режа олтита бўлимга бирлаштирилган 40 дан ортиқ турли тадбирларни ўз ичига олади ва улар, хусусан, чет элликларнинг Россия ҳудудига кириши, уларнинг мослашувига кўмаклашиш, талабалар, олимлар ва профессор-ўқитувчиларнинг эркин ҳаракатланишига, шунингдек, миграция қонунчилиги бузилишининг олдини олишга қаратилган.

Режада Россияда яшаш ва ишлашни хоҳловчилар учун хизматларни рақамлаштиришга алоҳида эътибор берилган.

Хусусан, режада хорижий фуқаронинг рақамли профилини яратиш бўйича чора-тадбирлар белгилаб қўйилган. Бунга эришиш учун ҳар бир чет эл фуқароси учун турли идоравий тизимлардаги миграция рўйхатга олиш маълумотларини бирлаштириш режалаштирилган. Бу ишни Рақамли ривожланиш вазирлиги, Ички ишлар вазирлиги, ФХХ, Иқтисодий ривожланиш вазирлиги ва Таълим ва фан вазирлиги амалга ошириши керак.

Худди шу санага бориб, режага кўра, Москва аэропортлари орқали Россияга келаётган хорижликларнинг биометрик маълумотларини йиғиш бўйича ўтказилган эксперимент натижалари умумлаштирилиши керак. Эксперимент давомида Ягона биометрик тизимда жойлашган шахсий маълумотлардан фойдаланган ҳолда хорижликларнинг аутентификацияси жараёни синовдан ўтказилади. Эксперимент, шунингдек, давлат геном рўйхатидан ўтказиш ва чет эл фуқароларининг овозини ёзиб олишни ўз ичига олади. Бу Москва ҳукумати, ФХХ, Ички ишлар вазирлиги, Рақамли ривожланиш вазирлиги ва бошқа манфаатдор органлар томонидан амалга оширилади.

Бундан ташқари, режа чет элликлар томонидан Россия қонунчилигини бузганлик учун жавобгарликни кучайтириш бўйича таклифлар тайёрлашни назарда тутади. Ушбу таклифлар Ички ишлар вазирлиги ва ФХХ томонидан тайёрланиб, 2024 йил март ойида ҳукуматга тақдим этилиши керак.

Россиянинг 2019-2025 йилларга мўлжалланган давлат миграция сиёсати концепцияси 2018 йилда президент фармони билан тасдиқланган. 2023 йилда у президент қарори билан янгиланди.