DOXA нашри Россияда «номақбул ташкилот» сифатида тан олинди

Россия Федерацияси бош прокуратураси давлат думаси Россия ички ишларига хорижий давлатлар аралашувини текшириш бўйича комиссиясининг DOXA нашрини «номақбул ташкилот» деб тан олиш ҳақидаги сўровини қаноатлантирди.

Фото: РИА Новости

DOXA нашри Россия Федерацияси бош прокуратураси томонидан «номақбул ташкилот» деб тан олинди. Бу ҳақда 25 январ, пайшанба куни давлат думасининг Россия Федерацияси ички ишларига хорижий давлатларнинг аралашувини текшириш бўйича комиссияси раиси Василий Пискарев маълум қилди.

«Россия Федерацияси бош прокуратураси бизнинг мурожаатимизни қўллаб-қувватлади ва Чехия Республикасида рўйхатдан ўтган талабалар нашри сифатида ниқобланган очиқ душман Mnenie media z.s. (DOXA) ташкилотининг фаолиятини Россия ҳудудида номақбул деб топди», — дейилади комиссия Telegram-каналида.

Пискарев таъкидлаганидек, нашрнинг ахборот ресурсларида «ҳарбий комиссарликлар, полиция бўлимлари ва ҳарбий техникага ўт қўйиш бўйича кўрсатмалар, россиялик ҳарбий хизматчиларни Украина қуролли кучларига таслим бўлишга чақиришлар, ҳуқуқни муҳофаза қилиш органларига қаршилик кўрсатиш ва университетларни эгаллаб олиш тўғрисидаги материаллар мавжуд».

Россия Федерациясида «номақбул» деб тан олинган ташкилотлар билан ўзаро муносабатлар ёки Россия қонунчилигига мувофиқ уларни молиявий қўллаб-қувватлаш учун жавобгарлик 5 йилгача қамоқ жазосини ташкил этади.

DOXA муҳаррирларини таъқиб қилиш

DOXA муҳаррирларини таъқиб қилиш 2021 йил апрел ойида бошланган. Собиқ бош муҳаррир Армен Арамян, шунингдек, собиқ муҳаррирлар Алла Гутникова, Владимир Метелкин ва Наталя Тишкевичга нисбатан вояга етмаганларни ноқонуний ҳаракатларга жалб қилишда айблови бўйича (Россия Федерацияси Жиноят кодексининг 151.2-моддаси) иш қўзғатилган. Бунга журналистлар сиёсатчи Алексей Навалнийни қўллаб-қувватловчи митингларда қатнашгани учун талабаларнинг таъқиб қилинишини қоралаган видеолавҳа сабаб бўлди.

2022 йил 12 апрелда Москванинг Дорогомилов туман суди тўрт муҳаррирни икки йиллик ахлоқ тузатиш ишларига ҳукм қилди. Бундан ташқари, уларга уч йил давомида интернетдаги веб-сайтларни бошқариш тақиқланган.

2022 йилнинг августида Арамян, кейин Тишкевич ва Гутникова Россияни тарк этганини эълон қилди. Ўша йилнинг сентябр ойида Россия ички ишлар вазирлиги Гутникова, Метелкин ва Тишкевични федерал қидирувга берди. Кейинчалик DOXA хабар қилганидек, Гутникова «Берлинда хавфсиз яшамоқда».

2023 йил февралида Москванинг Дорогомилов туман суди собиқ DOXA муҳаррири Алла Гутниковага нисбатан жазони кучайтириб, уни икки ойга умумий режимли колонияга ҳукм қилди.