Навоийда “дом”га ўрнатилаётган шахсий лифт бузиб ташланадиган бўлди

Навоий шаҳридаги кўп қаватли уйларнинг бирида мулкдор ўзи учун лифт ўрнатаётганлик ҳолати Навоий вилояти Қурилиш ва уй-жой коммунал хўжалиги соҳасида ҳудудий назорат қилиш инспекцияси томонидан 29 январ куни ўрганилган. Бу ҳақда Қурилиш вазирлиги расмий муносабат берди.

Маълум қилинишича, ўрганишда Навоий шаҳри Навоий кўчасидаги 30 D уйнинг 10-қавати (пентхаус)да жойлашган 2 та 46 ва 47-хонадонларни харид қилган мулкдор бинонинг ташқи ён фасад қисмидан фақатгина ўзи фойдаланиши учун лифт қурилмаси ўрнатаётганлиги аниқланган. Мулкдор инспекциянинг лифт қурилмасини ўрнатиш юзасидан асослантирувчи ҳужжатлар бўйича сўровига тегишли ташкилотлар томонидан имзоланган таклиф лойиҳасини тақдим этган.

Мулкдорга кўп квартирали уйнинг умумий мулкидан фойдаланиш қоидалари, бунда аҳоли олдига қўйиладиган талаблар тушунтирилган ва ўзбошимчалик билан қурилган қурилмани бартараф этиш бўйича тегишли тартибда мажбурий кўрсатма берилган. Шунингдек, ҳолат юзасидан 2024 йил 1 феврал куни Навоий шаҳар прокуратурасига тегишли ҳужжатлар тақдим қилинган.

“Кўп квартирали уйларни бошқариш тўғрисида”ги қонунга кўра, кўп квартирали уйдаги умумий жойлар, таянч ва тўсиқ конструкциялар, квартиралар оралиғидаги иҳоталанган (ўрама) пиллапоялар, зинапоялар, лифтлар, лифтнинг шахталари ҳамда бошқа шахталар, даҳлизлар, техник қаватлар, ертўлалар, чердаклар ва томлар, уй ичидаги муҳандислик тармоқлари ҳамда коммуникациялари, жойларнинг ташқарисида ёки ичида жойлашган ва биттадан ортиқ жойга хизмат кўрсатадиган механик, электр, санитария-техника ускуналари ва қурилмалари ҳамда бошқа ускуна ва қурилмалар умумий мол-мулкдир. Умумий мол-мулк жойларнинг мулкдорларига умумий улушли мулк ҳуқуқи асосида тегишли ҳисобланади”, дейилади вазирлик муносабатида.

Олдинроқ Навоийда фуқаро «дом»га ўзи учун алоҳида лифт ўрнатмоқчи бўлаётгани хабар қилинганди.