Навалнийнинг жасади яна икки ҳафта давомида оиласига кўрсатилмайди

Терговчилар Алексей Навалнийнинг жасадини унинг онаси Людмилага беришдан бош тортди. Россиялик мухолифатчининг тарафдорлари 19 феврал, душанба куни хабар берганидек, унга нисбатан яна 14 кун давомида «кимёвий экспертиза» ўтказилади.

«Яна такрор айтаман: Навалнийнинг жасади қотиллик изларини беркитиш учун яширилган. 14 кунлик «кимёвий текширув» очиқдан-очиқ ёлғон ва масхарабозликдир», - деб ёзди Навалнийнинг матбуот котиби Кира Ярмиш Х ижтимоий тармоғидаги ўз аккаунтида. Бу ҳақда Коррупцияга қарши курашиш жамғармаси (ФБК) раҳбари Иван Жданов ҳам маълум қилди. 

Алексей Навалнийнинг жасади бир неча кун давомида қидирилди 

17 феврал куни кечқурун Навалнийнинг матбуот котиби DW билан суҳбатда Салехардда содир бўлаётган воқеаларни изоҳлар экан, шундай деди: «Биз Алексей Навалнийнинг жасади қаердалигини тушунмаяпмиз, у оиласига берилмаяпти. Бундан ташқари, ҳеч ким у жисмонан қаерда жойлашганлигини айтмаяпти». 

Ярмиш сўзларига кўра, сиёсатчи ўлимининг эртасига колония ходимлари унинг адвокати ва онасига жасад Салехард ўликхонасида эканлигини, Тергов қўмитаси ходимлари уни ўша ерга олиб кетганини айтган. 19 феврал куни эрталаб Людмила Навалная ва унинг адвокатлари ўликхонага кирмоқчи бўлди, бироқ уларни ичкарига киритишмади: «Адвокатлардан бирини том маънода ташқарига чиқариб юборишди», деди матбуот котиби. 

50 мингдан ортиқ киши Навалнийнинг жасадини оиласига топширишни талаб қилди.