Росселхознадзор Ўзбекистондаги уруғлик синов лабораторияларини текширади

Россиянинг Росселхознадзор ташкилоти 2024 йилда олтита давлатда қишлоқ хўжалиги уруғларини синовдан ўтказувчи лабораториялар аудитини ўтказишни режалаштирди. Ташкилот раҳбари Сергей Данкверт сўзларига кўра, булар Чили, Озарбойжон, Таиланд, Туркия, Аргентина ва Ўзбекистон.

«Ташкилот «Уруғчилик тўғрисида»ги қонун кучга кирганлиги тўғрисида Россияга уруғлик етказиб берувчи 108 давлатни хабардор қилди», деди Данкверт.

Қонун уруғ етказиб берувчи мамлакатлардаги лабораторияларнинг Россия қонунчилигига мувофиқлигини тасдиқлаш учун аудит ўтказишни назарда тутади. 2024 йил 1 сентябрдан бошлаб лабораториялари аудитдан ўтмаган мамлакатлардан уруғлик ва кўчат материалларини олиб кириш тақиқланади.

Тўққиз мамлакатдаги 33 та уруғлик синов лабораторияларида аудит аллақачон ўтказилган. Булар Жанубий Корея, Сербия, Исроил, Мексика, Чехия, Молдова, Бразилия, Венгрия, Франция.

Бундан ташқари, 26 давлат Росселхознадзор томонидан сўралган маълумотларни тақдим этган. Улар орасида, хусусан, Аргентина, Бразилия, Венгрия, Миср, Исроил, Индонезия, Иордания, Канада, Қатар, Хитой, Туркия, Ўзбекистон, Франция, Чили, Швейцария ва бошқалар бор.

Тўрт давлат аудит ўтказишдан бош тортган: Абхазия, Боливия ва Тожикистонда уруғлик синов лабораториялари йўқ, Қатар рад этишни уруғлик таъминоти йўқлиги билан изоҳлаган.