НАТО бош котиби алянсга аъзо давлатлар ташқи ишлар вазирлари йиғилишида Украина учун махсус миссия яратиш масаласини муҳокамага қўймоқчи, деб ёзади жаҳон агентликлари.
НАТО бош котиби Йенс Столтенберг Украина учун махсус миссияни (NATO Mission Ukraine) тузишни ва алянснинг Киевга беш йил муддатга 100 миллиард евро миқдорида ҳарбий ёрдам кўрсатишини келишишни таклиф қилмоқда. Бу ҳақда dpa ва AFP ахборот агентликлари 3 апрел, чоршанбага ўтар кечаси дипломатик доиралардаги манбаларга таяниб ёзган.
Таъкидланишича, бундай режалар НАТОга аъзо давлатлар ташқи ишлар вазирларининг 3-4 апрел кунлари Брюсселда алянс ташкил этилганининг 75 йиллиги муносабати билан бўлиб ўтадиган йиғилишида муҳокама қилинади. Россия ҳужумига учраган мамлакатни қўллаб-қувватлашни кенгайтириш бўйича якуний қарор июл ойида Вашингтонда бўлиб ўтадиган НАТО саммитига қадар кутилмаяпти.
НАТОнинг Украина миссияси мақсадлари
Таъкидланганидек, агар Украинада НАТО миссияси ташкил этилса, унинг асосий вазифаси Украина ҳарбийларини қурол-яроғ билан таъминлаш ва ўқитишни мувофиқлаштириш бўлади. Айни пайтда Қўшма Штатлар тегишли ишларни амалга оширмоқда, шу мақсадда Германиянинг Рамштайн авиабазасида ёки Брюсселда мунтазам учрашувлар ташкил этмоқда. Енс Столтенбергнинг ғояси НАТО Украинани қўллаб-қувватлашини умумий даражага олиб чиқиш, уни алоҳида аъзо мамлакатлардаги сиёсий вазиятдан мустақил қилиш, айниқса Доналд Трампнинг Оқ уйга қайтиши эҳтимолини ҳисобга олган ҳолда муҳимдир, дея тушунтиради dpa. Бу ҳақда Politico ҳам ёзяпти.
НАТО давлатлари томонидан Украинани ҳарбий қўллаб-қувватлаш учун 100 миллиард евро жамғарма яратиш истиқболи бўйича кўплаб саволлар қолмоқда. Хусусан, алоҳида давлатлар томонидан бу мақсад учун ажратилган маблағлар ҳисобга олинадими ёки йўқми, аниқлик мавжуд эмас.
Германия НАТОнинг Украинадаги роли ортиб бораётганидан хавотирда
НАТО вакили Столтенбергнинг таклифларига изоҳ беришдан бош тортди ва фақат журналистлар илтимосига кўра НАТОга аъзо давлатлар ташқи ишлар вазирларининг 3 ва 4 апрел кунлари бўлиб ўтадиган йиғилишида Шимолий Атлантика алянсининг Украинани қўллаб-қувватлашини қандай кучайтиришни муҳокама қилишини тасдиқлади.
Германия ҳукумати, хусусан, федерал канцлер идораси НАТОнинг Украинадаги ролини кучайтириш бўйича таклифлардан ҳозирча ўзини тийиб келган. Бу позиция урушни НАТО ҳудудига кенгайтириш ва Россия билан можаронинг янада кучайиши эҳтимолидан ташвишланиш орқали изоҳланади.
