Ўзбекистонда маҳалла кутубхоналари фаолияти йўлга қўйилади 

Ахборот ва оммавий коммуникациялар агентлиги, Ўзбекистон маҳаллалар уюшмаси, Республика маънавият ва маърифат маркази ҳамда Ўзбекистон Ёзувчилар уюшмасининг:

• маҳалла кутубхоналари ҳамда ташаббускор фуқаролар ўз ҳисобидан ташкил этган хусусий кутубхоналар фаолиятини доимий қўллаб-қувватлаб бориш;
• йилда бир маротаба хусусий кутубхоналар фаолиятини ташкил этган фуқароларни ва маҳалла кутубхоналари учун масъул ходимларни “Ахборот-кутубхона аълочиси”, “Маънавият фидойиси” кўкрак нишонлари билан тақдирлаш;
• 2024 йилдан бошлаб ҳар йили хусусий кутубхоналар ва маҳалла кутубхоналари ўртасида “Йилнинг энг яхши хусусий кутубхонаси” ва “Йилнинг энг яхши маҳалла кутубхонаси” танловларини ўтказиш;
• Қорақалпоғистон Республикаси, вилоятлар ва Тошкент шаҳридаги камида биттадан ахборот-кутубхона муассасасида адабиётлар ҳисобини юритиш, уларни сақлаш ва рақамлаштириш, аҳолига замонавий ахборот-кутубхона хизматини кўрсатиш тизимини яратиш тўғрисидаги таклифлари маъқулланади.

Қорақалпоғистон Республикаси Вазирлар Кенгаши, Тошкент шаҳар ва вилоят ҳокимликлари Ўзбекистон маҳаллалар уюшмаси билан биргаликда:

2025 йилдан бошлаб босқичма-босқич маҳалла кутубхоналари фаолиятини йўлга қўяди. Бунда, дастлабки босқичда маҳалла кутубхоналари туман (шаҳар) марказидан узоқ масофада жойлашган маҳаллаларда ташкил этилади;
ҳар йили маҳалла кутубхоналари китоб фондини янги адабиётлар билан бойитиб бориш чораларини кўради.

Белгилаб қўйилишича:

• маҳалла кутубхоналарининг китоб фондини доимий янгилаб бориш билан боғлиқ харажатлар Маҳалланинг ижтимоий-иқтисодий муаммоларини ҳал этиш жамғармаси, маҳаллий ҳокимликлар томонидан ажратиладиган, шунингдек, жалб этиладиган ҳомийлик хайрия маблағлари ҳисобидан амалга оширилади;
• маҳалла кутубхоналарида кутубхона ишларини юритиш маҳалла фуқаролар йиғинларида фаолият кўрсатаётган ходимлар томонидан олиб борилади;
• маҳалла кутубхоналари фаолиятини услубий-методик таъминлаш туман (шаҳар) ахборот-кутубхона марказлари томонидан амалга оширилади;
• хусусий ва маҳалла кутубхоналарини ташкил этишда, уларнинг фаолият юритишида ҳамда жойларда аҳоли ўртасида китобхонликни тарғиб қилишда катта ҳисса қўшаётган фуқароларга “Ахборот-кутубхона аълочиси”, “Маънавият фидойиси” кўкрак нишонлари Ахборот ва оммавий коммуникациялар агентлиги, Республика маънавият ва маърифат маркази, Ўзбекистон маҳаллалар уюшмаси, Ёзувчилар уюшмаси раҳбар ва масъул ходимлари ҳамда туман ва шаҳар ҳокимлари иштирокида тантанали равишда топширилади;
• “Йилнинг энг яхши хусусий кутубхонаси” ва “Йилнинг энг яхши маҳалла кутубхонаси” танловлари икки босқичда, Қорақалпоғистон Республикаси, вилоятлар ва Тошкент шаҳарда ҳудудий босқич ҳамда ҳудудий босқич ғолиблари ўртасида республикаси босқичи ўтказилади;
• “Йилнинг энг яхши хусусий кутубхонаси” ва “Йилнинг энг яхши маҳалла кутубхонаси” танловлари бўйича ҳар биридан жами 42 нафардан ғолиб ва совриндорлар аниқланиб, улар базавий ҳисоблаш миқдорининг 15 баробаридан 50 баробаригача пул мукофотлари билан тақдирланади;
• “Йилнинг энг яхши хусусий кутубхонаси” ва “Йилнинг энг яхши маҳалла кутубхонаси” танловлари билан боғлиқ сарф-харажатлар Ўзбекистон Республикасининг ахборот соҳаси ва оммавий коммуникацияларни ривожлантиришни қўллаб-қувватлаш, Маҳалланинг ижтимоий-иқтисодий муаммоларини ҳал этиш ҳамда Маънавият ва ижодни қўллаб-қувватлаш мақсадли жамғармалари ҳисобидан тенг улушларда қопланади.