ЕИ Украина қишлоқ хўжалиги маҳсулотларига божлар бўйича муросани маъқуллади

Агар импорт квоталари ошиб кетса, Украинадан келган айрим қишлоқ хўжалиги маҳсулотларига Европа Иттифоқи мамлакатларида бож тўланади. Бу муроса Европа Иттифоқига аъзо давлатлар ва Европа парламенти вакиллари томонидан маъқулланди.

Фото: Hiroto Sekiguchi/Yomiuri Shimbun/AP/picture alliance

Европа Иттифоқига аъзо давлатлар ва Европарламент вакиллари Украинадан айрим қишлоқ хўжалиги маҳсулотларини олиб киришда квоталар ошиб кетган тақдирда божлар жорий этиш бўйича аввал эришилган келишувни тасдиқлади. «Бу Украинага Европа Иттифоқи билан савдо оқимларидан даромад олишда давом этиш ва шу билан бирга, қишлоқ хўжалиги маҳсулотларини ҳимоя қилишни кучайтириш имконини беради», деди Белгиянинг Европа Иттифоқи кенгашидаги раислиги душанба, 8 апрел куни ўз веб-сайтида.

Украинадан товуқ гўшти, тухум, шакар, жўхори, маккажўхори ва асалга божлар, агар ушбу товарлардан бирортасининг импорт ҳажми 2021 йил ўрталаридан 2023 йил охиригача бўлган даврдаги ўртача кўрсаткичдан ошса, жорий этилади. Илгари, Украина Европа Иттифоқи мамлакатларига сезиларли даражада камроқ маҳсулот импорт қилган кенг кўламли урушдан олдинги даврни ҳисобга олмаслик режалаштирилган эди. Бироқ, хусусан, Франция ва Полшанинг талабига биноан, квотани ҳисоблаш учун олинган муддат узайтирилди, бу Украина қишлоқ хўжалиги маҳсулотларини божсиз олиб кириш ҳажмини камайтиради.

Квоталар ҳали буғдойга таъсир қилмаяпти - аммо бу унинг Украинадан Европа Иттифоқига импорти «кескин ўсадиган» бўлса, амалга оширилиши мумкин. Энди янги қоидалар Европарламентнинг апрел ойида бўлиб ўтадиган ялпи мажлисида тасдиқланиши керак, шундан сўнг чора-тадбирлар ЕИ кенгаши томонидан тасдиқланади ва Европа Иттифоқининг расмий журналида чоп этилади. Тарифлар 2024 йил 6 июндан кучга кириши кутилмоқда.

Фермерлар Украинадан бож олинмайдиган импортга норозилик билдирди

Брюссел Украина иқтисодиётини қўллаб-қувватлаш мақсадида Россиянинг 2022 йилда қўшни давлатга кенг кўламли ҳужуми бошланганидан сўнг, Украина қишлоқ хўжалиги маҳсулотлари импортига бож ва квотани бекор этишга қарор қилди. Бироқ бу бир қатор мамлакатлардаги европалик фермерларнинг ғазабини қўзғатди ва улар Украинадан арзонроқ маҳсулотлар божсиз олиб кирилиши бизнесига зарар етказаётганини айтди. Хусусан, полшалик фермерлар норозилик сифатида мунтазам равишда Украина билан чегарани тўсмоқда.

Аввалроқ Полша, Венгрия, Словакия, Руминия ва Болгария бир томонлама равишда Украинанинг айрим қишлоқ хўжалиги маҳсулотлари импортини чеклаганди.