Украина президенти фуқароларни электр энергиясини тежашга чақирди

Украина президенти Володимир Зеленский ватандошларини энергетика инфратузилмаси ўққа тутилиши шароитида электр энергиясини тежашга чақирди. «Россия зарбаларидан сўнг бизнинг энергетика соҳамиз ўз қувватининг катта қисмини йўқотди, тикланиш учун вақт керак», деди давлат раҳбари 17 май, жума куни ватандошларига мурожаатида.

Бундан ташқари, Украина навбатдаги иситиш мавсумига тайёргарлик кўрмоқда, бу режалаштирилган таъмирлаш ва ядровий ишлаб чиқаришни тайёрлашни ўз ичига олади, деди Зеленский. Шу сабабли, энди электр энергиясини оқилона ва ўйланган ҳолда истеъмол қилиш зарурати яна пайдо бўлди, дея тушунтирди у. Энергетика компаниялари аҳолини электр таъминотидаги мавжуд узилишлар, энг юқори юкланишлар ва энергия истеъмолига онгли муносабат ҳақида хабардор қилиши керак, дея таъкидлади Украина раҳбари.

Киев ҳаво ҳужумидан мудофаа тизимлари ёрдамида мамлакат ҳудудини ҳимоя этишга ҳаракат қилмоқда, деди Зеленский. Украина томони ўз ҳамкорларига ҳаво мудофаасини кучайтириш зарурлигини таъкидламоқда, дея қўшимча қилди у.

Украинада фавқулодда электр узилишлари

Россия қўшинлари ҳужумидан бери Украина энергетика инфратузилмаси объектларининг ўққа тутилиши бир неча бор алоҳида ҳудудларда ҳам, бутун мамлакат бўйлаб ҳам электр таъминотининг фавқулодда узилишларига олиб келди. Хусусан, 18 май куни соат 19 дан 24 соатгача бутун Украина бўйлаб саноат истеъмолчилари учун электр энергияси чекланиши амал қилади, деб хабар берди «Укрэнерго» миллий энергия тизимлари оператори.

Бу Россия томонидан 22 мартдан бери ракеталар ва учувчисиз учиш аппаратлари ёрдамида амалга оширилган бешта ҳужум оқибатлари билан боғлиқ, дея тушунтирди компания. Зарар туфайли Украина электр станциялари ҳужумлардан олдингидек электр энергияси ишлаб чиқара олмайди. 18 майдаги чекловлар аҳолига таъсир қилмайди, деб ишонтирди «Укрэнерго».