Россияда Ан-26 йўловчи самолёти ҳалокатга учради

Россиянинг Utair авиакомпаниясига тегишли Ан-26 йўловчи самолёти Ямал-Ненец автоном округидаги Утренний аэропортидан 2 километр узоқликда қаттиқ қўнишни амалга оширди.  

Урал транспорт прокуратураси хабарига кўра, ҳодиса маҳаллий вақт билан 15:40 атрофида юз берган. Самолёт бортида 41 киши — беш экипаж аъзоси ва 36 йўловчи бўлган. 

Ижтимоий тармоқларда тарқалган фотосуратларда самолётнинг қорли майдонга қулагани ва қаттиқ шикастлангани кўринади. 

Utair хабарига кўра, ҳодисада йўловчи ва икки экипаж аъзоси жароҳат олган ва уларга тиббий ёрдам кўрсатилган.  

«Ан-26 самолёти кескин ёмонлашган об-ҳаво - туман, кучли шамол шароитида қўнди. Барча йўловчилар ва экипаж аъзолари аэропорт терминали биносига эвакуация қилинди», дейилади хабарда. 

Россия Тергов қўмитаси воқеа юзасидан процессуал тергов ташкил этилганини маълум қилди.  

«Ҳодисанинг барча ҳолатлари ва сабаблари аниқланмоқда. Барча керакли текшириш тадбирлари ўтказилгандан сўнг процессуал қарор қабул қилинади», деб қўшимча қилди бошқарма.