ОАВ: Трампни отган шахснинг машинасидан портловчи модда топилди

АҚШ собиқ президенти Доналд Трампни Пенсилваниядаги митинг вақтида ўлдиришга уринган қотил Мэттю Круксга тегишли машинадан портловчи восита топилди. Бу ҳақда CNN ва Wall Street Journal ёзмоқда.

Крукс машинасини митинг ўтказилаётган майдон яқинида қолдирган. Улов текширилганда ичидан портловчи восита топилган. АҚШ нашрларига кўра, қотилнинг уйи текширилганда у ердан портловчи восита тайёрлаш учун материаллар топилган.

Мэттю Крукс собиқ президент ва ноябрда ўтажак сайловда президентликка номзод бўлган Доналд Трамп сайловолди митингини ўтказаётган вақтда унга қарата 10 марта ўқ узган. Ўқлардан бири Трапмнинг қулоғини ялаб ўтган. Бошқа ўқ эса бир одамни ўлдирган, яна икки киши яраланган.

Трамп суиқасддан омон қолди. Полиция мергани қотилни у Трампга ўқ узганидан бир неча сония ўтиб отиб ўлдирган. Трамп айни дамда саломат ва кейинги чиқишларига тайёргарлик кўраётганини айтган.