"Норникель" санкциялар туфайли ишлаб чиқаришни Хитойга кўчиради

Хитой банклари АҚШнинг иккиламчи санкциялари таҳдиди туфайли "Норильский никел"дан тўловларни блокламоқда. Унинг раҳбари Владимир Потанин айтишича, компания мис эритиш заводини Норилскдан Хитойга кўчиришни режалаштирмоқда.

Фото: Sergei Karpukhin/TASS/dpa/picture alliance

Россиянинг "Норильский никел" компанияси Хитойда ишлаб чиқаришни очиш ниятида. Бунга Хитой банклари Американинг иккиламчи санкцияларидан хавотирланиб, тўловларни тўсиб қўйгани сабабли Хитойга металларни экспорт қила олмаслик сабаб бўлмоқда, деб хабар берди Bloomberg агентлиги 18 июн, пайшанба куни икки манбага таяниб.

Нашрнинг ёзишича, "Норникель" аккумулятор ишлаб чиқарувчи CNGR Advanced Material ва Brunp Recycling компаниялари билан Россиядан ярим тайёр маҳсулот етказиб бериладиган никел заводи қуриш бўйича музокаралар олиб бормоқда. Корхона заводга йилига 50 минг тонна металл етказиб беришга тайёр, бу 2023 йилда корхонада ишлаб чиқарилган никел умумий ҳажмининг деярли 25 фоизини ташкил этади.

"Норникель" раҳбари Владимир Потанин апрел ойида компания мис эритиш заводини Норилскдан Хитойга кўчиришни режалаштираётганини айтди, чунки Ғарб санкциялари туфайли корхонани модернизация қилиш учун Россияга ускуналар етказиб беришнинг иложи йўқ.

Иккиламчи санкциялар таҳдиди

Бир қатор металлар, шу жумладан никел ва платина гуруҳидаги металлар бўйича дунёдаги энг йирик ишлаб чиқарувчи "Норникель" АҚШ ва Европа Иттифоқи санкцияларига дучор бўлмаган, бироқ Украинага қуролли ҳужум сабабли Россияга қарши санкциялар киритилгандан сўнг компания таъминотни қайта йўналтиришга мажбур бўлди. Унинг энг йирик экспорт бозори Хитой бўлиб, ҳозирда сотув ҳажми ярмидан кўпи унинг ҳиссасига тўғри келади.

Бироқ сўнгги пайтларда Хитой билан савдода муаммолар юзага келди. АҚШ декабр ойида Россия ҳарбий-саноат комплекси ишини осонлаштирадиган молия институтларига қарши иккиламчи санкциялар жорий этишга тайёрлигини эълон қилганидан кейин Хитой банклари Россия тўловларини қайта ишлашни кучайтирди. Июн ойида чора-тадбирлар кенгайтирилди. Натижада Хитойнинг йирик банклари Россия компанияларига нафақат долларда, балки юанда ҳам тўловларни тўсиб қўймоқда.