Байден ваколатлари муддатининг охиригача президент бўлиб қолади

АҚШнинг амалдаги президенти Жо Байден халққа мурожаат қилиб, муддати охиригача ўз лавозимида қолишини тасдиқлади. У 50 йиллик сиёсатдан сўнг «машъалани янги авлодга топшираётганини» айтди.

Фото: Tom Brenner / Reuters

Жо Байден 25 июл, чоршанба куни кечқурун халққа қилган мурожаатида, ўз муддати тугагунча, яъни яна олти ой Қўшма Штатлар президенти лавозимида қолишини тасдиқлади. У миллий мудофаа, саратон ва глобал иқлим ўзгаришига қарши курашни устувор вазифалар сифатида белгилади. Байден, шунингдек, 26 июл куни Исроил бош вазири Бинямин Нетаняҳу билан учрашиб, Ғазо секторида ўт очишни тўхтатиш имкониятини муҳокама қилмоқчи.

«Мен олдинга силжишнинг энг яхши йўли - бу машъалани янги авлодга топшириш, деб қарор қилдим», - дея Reuters 81 ёшли АҚШ президентининг нутқидан иқтибос келтиради. Гап Байденнинг ноябр ойида бўлиб ўтадиган АҚШ президентлик сайловларида Демократик партиядан номзод бўлиши учун вице-президент Камала Ҳаррисни қўллаб-қувватлаш қарори ҳақида кетмоқда. Байден ўз нутқида Ҳаррисни тажрибали, қаттиққўл ва малакали сиёсатчи деб атади.

«Американи буюк қиладиган нарса шундаки, қироллар ва диктаторлар ҳокимиятга эга эмас. Одамлар бор. Тарих сизнинг қўлингизда. Куч сизнинг қўлингизда. Америка ғояси сизнинг қўлингизда», деди Жо Байден.

Байденнинг пойгадан чиқиши ва Ҳаррис номзоди

Жо Байден 21 июл куни АҚШ президентлиги сайловидан ўз номзодини қайтариб олишини эълон қилган эди. Амалдаги давлат раҳбари бу қарорни Демократик партия ва бутун мамлакат манфаатларини кўзлаб қабул қилганини алоҳида таъкидлади. Байден ўз ўрнига Камала Ҳаррисни таклиф қилиб, уни «тўлиқ қўллаб-қувватлашини» билдирди. Кейинчалик Камала Ҳаррис АҚШ президентлигига номзодини қўйишни режалаштираётганини маълум қилди. У республикачи Доналд Трампни мағлуб этиш учун «Демократик партия ва халқни бирлаштириш» мақсадида «ҳамма нарсани қилишини» қўшимча қилди.

Шунингдек, АҚШ президенти Жо Байден пойгадан чиққанидан сўнг, вице-президент Камала Ҳаррис бўлажак сайловларда номзод бўлиш учун Демократик партия делегатларининг кўпчилиги томонидан қўллаб-қувватланганини эълон қилди. «Бугун кечаси партия номзоди учун зарур бўлган кенг кўламли қўллаб-қувватлашга эришганимдан фахрланаман», деди у 22 июл куни.

Бундан ташқари, Ҳаррис Reuters агентлиги ва Ipsos компанияси томонидан ўтказилган миллий сўровномада собиқ президент Доналд Трампни ортда қолдирди. Ҳаррисни респондентларнинг 44 фоизи, Трампни эса 42 фоизи қўллаб-қувватлаган. У Байден курашни давом эттиришдан бош тортганини эълон қилганидан кейин 24 соат ичида рекорд миқдорда – 81 миллион доллар маблағ йиғди.