Россия Адлия вазирлиги 55 ташкилотни «экстремистик» деб тан олди

Россия Адлия вазирлиги 55 та ташкилотни «экстремистик» ташкилотлар рўйхатига киритди. 26 июл, жума куни «Первый отдел» инсон ҳуқуқлари ташкилоти бунга эътибор қаратди. Вазирлик барча 55 ташкилотни мавжуд бўлмаган «Россияга қарши сепаратистик ҳаракат»нинг «таркибий бўлинмалари» деб ҳисоблаяпти, улар фаолияти илгари Россия Федерацияси ҳудудида тақиқланган.

«Экстремистик» ташкилотлар рўйхатига Американинг Free Russia Foundation («Озод Россия»), «Россияда осиёликлар» ва «Эркин Бурятия» жамғармалари, «Эркин миллатлар лигаси», «Озод Ингрия» ҳаракати ва бошқалар киритилган. Адлия вазирлиги рўйхатида жами 160 дан ортиқ бандлар мавжуд. 

Мавжуд бўлмаган «Россияга қарши сепаратистик ҳаракат» «экстремистик» деб тан олинган

2024 йил июн ойи бошида Россия Олий суди Адлия вазирлигининг илтимосига биноан «Россияга қарши сепаратистик ҳаракат» ва «унинг таркибий бўлинмалари»ни Россия Федерацияси ҳудудида «экстремистик» ташкилот деб тан олди. 

Журналистлар аниқлаганидек, бундай номдаги ҳаракатнинг ўзи йўқ. Шунга қарамай, Адлия вазирлиги «Россияга қарши сепаратистик ҳаракат»ни «Россиянинг кўп миллатли бирлиги ва ҳудудий яхлитлигини бузиш» билан шуғулланадиган халқаро ижтимоий ҳаракат деб атади.

Аввалроқ, 2024 йилнинг феврал ойида Россияда мавжуд бўлмаган «Я/Мы Сергей Фургал» ҳаракати «экстремистик» деб тан олинган эди.

Март ойининг ўрталарида Россия Федерациясида экстремистик жамиятни ташкил этиш ёки унда иштирок этиш бўйича биринчи иш очилди (Россия Федерацияси Жиноят кодексининг 282.1-моддаси). Оренбургдаги бар ходимлари айбланувчиларга айланди.