Россия кенг кўламли ҳарбий-денгиз машқларини бошлади

Россия Арктика, Болтиқ ва Каспий денгизлари ҳамда Тинч океанида кенг кўламли ҳарбий-денгиз машқларини бошлади. «Россия ҳарбий-денгиз кучларининг бирлашмалари ва тузилмалари Шимолий, Тинч океани ва Болтиқ флотларининг операцион зоналарида, шунингдек, Каспий флотилияси масъулияти зонасида режалаштирилган машғулотларни ўтказишни бошладилар», деб хабар қилди сешанба, 30 июл куни Россия Мудофаа вазирлиги Telegram’да.

20 мингдан ортиқ иштирокчилар 

Маневрларда 300 га яқин кемалар, катерлар, сувости кемалари ва ёрдамчи кемалар, 50 тагача учиш аппарати, 200 дан ортиқ ҳарбий ва махсус техника, шунингдек, 20 мингдан ортиқ ҳарбий ва фуқаролик ходимлари иштирок этмоқда, дейилади хабарда. 

Кўп кунлик ўқув машғулотлари мақсади денгиз флотининг «ҳарбий қўмондонлик ва назорат органлари ҳаракатларини синовдан ўтказиш» ва «кемалар экипажлари, денгиз авиацияси бўлинмалари ва Россия денгиз флоти қирғоқ қўшинлари ўз олдига қўйилган вазифаларни бажаришга тайёрлигини текшириш». Маневрлар давомида 300 дан ортиқ «қуроллардан амалий фойдаланиш билан жанговар машқлар» ўтказилиши кутилмоқда. Гап бошқа нарсалар қаторида зенит-ракета ва артиллериядан денгиз ва ҳаводаги нишонларни отиш ҳақида бормоқда. 

Айни пайтда, Россиянинг Украинага қарши урушида қатнашаётган ва сўнгги икки йил давомида катта йўқотишларга учраган Россия Қора денгиз флоти машғулотларда қатнашмаяпти.