Байден ҳам Россиядан қайтарилган америкаликларни аэропортда кутиб олди

Шунингдек, АҚШ президенти маъмурияти Россиядан озод этилган, АҚШ фуқаролиги ёки Америка грин-картасига эга бўлганларнинг Жо Байден ва ўз яқинлари билан телефон орқали мулоқоти видеосини эълон қилди.

ABC News трансляциясига кўра, Россия билан алмашув доирасида озод этилганларни Гершкович, Курмашева ҳамда Уиланнинг қариндошлари, шунингдек АҚШ президенти Жо Байден ва вице-президент Камала Ҳаррис кутиб олишган.

«Мен уйдаман», — деган Гершкович самолёт олдида кутиб турган The Wall Street Journal нашридаги ҳамкасбларига.

Жо Байден бу лаҳзаларни узоқ кутганини айтган. «Буни уддалай олишимизга ишончим комил эди», — деган АҚШ президенти.

Байден уларнинг учаласи билан ҳам қучоқлаб кўришган, Гершкович эса президент ва вице-президент билан кўришганидан кейин онасининг олдига бориб, уни кўтариб олган.

Оқ уй маъмурияти алмашув иштирокчилари ҳали самолётда эканида алмаштирилаётган маҳбусларнинг ўз оила аъзолари билан ўтказган телефон мулоқоти видеосини ҳам эълон қилди.

«Мен шунчаки муносиб сўзларни топа олмаяпман, қамоқхонада ўлишимга амин эдим. Бўлаётган ишларга ишона олмаяпман. Сенинг овозингни эшитиш ўрнига ҳамон Омскда камерамда ухлаётгандекман», — деган ўз қизига Владимир Кара-Мурза.

У шунингдек президент Байденга мурожаат қилган: «Айтишни истардимки, сиз катта ишни бажардингиз, жуда кўп одамлар ҳаётини қутқардингиз. Менимча, бу самолётда 16 кишимиз. <...> Мен шунчаки айтишни истардимки, бу дунёда инсонлар ҳаётини қутқаришдан муҳимроқ ишлар бор деб ўйламайман».

Эван Гершкович, Алсу Курмашева ва Пол Уилан 1 август куни Россия ва Ғарб мамлакатлари ўртасидаги алмашув доирасида озод этилди. Алмашувда Россия 16 кишини қўйиб юборган ва саккиз фуқаросини қайтариб олган. Россияга қайтганлар орасида ФХХ зобити, Германияда собиқ чечен қўмондонини ўлдиргани учун умрбод қамалган Вадим Красиков, шунингдек Словенияда жосуслик учун қамалган Россия агентлари Артём ва Анна Дульцевалар ҳам бор.