Беларус ҳокимияти томонидан озод этилган сиёсий маҳбуслар Чернихив вилоятида биринчи матбуот анжуманини ўтказди. Мухолифат сиёсатчилари Мария Колесникова ва Виктор Бабарико, ҳуқуқ ҳимоячиси Владимир Лабкович ҳамда сиёсатшунос Александр Федута якшанба куни, 14 декабрда қамоқда бўлган даври ва озод этилгани ҳақидаги ҳолатларни баён қилди. Озод этиш бир кун олдин, Минскда АҚШ делегацияси билан Беларус ҳокимияти ўртасидаги музокаралар натижаси сифатида амалга ошган.
Мария Колесникова 2020 йилда Беларусни тарк этишдан бош тортгани ва шундан кейин қўлга олингани ҳақида афсусланмаслигини айтди. «Шундай пайтлар бўладики, ҳаёт олдимизга шундай саволларни қўяди ва биз қийин танлов қилишимизга тўғри келади. Мен бу қийин танловни жуда осон қилдим, чунки мен Виктор Дмитриевич (Бабарико — таҳр.) ва унинг ўғли Эдуард ифода этаётган тўғри ғояни қўллаб-қувватлаганимга, қадриятларимни ҳимоя қилганимга ишонганман ва ҳануз шундай. Мен ёлғиз эмасман, бундайлар кўп», — деди у.
Колесникова озодликка чиққани учун АҚШ ва Украина президентлари Доналд Трамп ва Володимир Зеленскийга миннатдорлик билдирди. «Ҳозир содир бўлаётган ишлар, ишнинг ўлик нуқтадан силжиши ва ижобий ўзгаришларга умид пайдо бўлгани учун Доналд Трамп ва унинг жамоасига раҳмат айтмоқчиман. Президент Зеленскийга ва бутун Украина халқига — бизларни қабул қилганингиз, кеча ва бугун сизнинг муҳаббатингиз ва қўллаб-қувватлашингизни ҳис қилаётганимиз учун раҳмат», — деди у Украинадаги матбуот анжуманида.
У, шунингдек, Беларус раҳбари Александр Лукашенконинг сиёсий маҳбусларни озод қилишга рози бўлгани учун ҳам миннатдорлик билдирди ва бу йўналишда кейинги қадамлар бўлишига умид билдирди. «Агар биз бу йўналишда нимадир қила олсак, албатта қиламиз. Лекин ҳозир ҳаммаси мутлақо бизга боғлиқ эмас, деб ўйлайман. Биз қамоқда қолганларнинг барчаси озод бўлган кунни мамнуният билан қарши оламиз, ва ҳаммамиз уйга қайтишимиз — биз учун жуда оғриқли масала. Илк қадамлар оптимизм бағишлаяпти, умид қиламиз, бу давом этади», — деди собиқ сиёсий маҳбус.
Колесникова, шунингдек, озод қилинганлар орасида биринчи бўлиб Украина ҳудудига чиққанини ва энг аввало «шахсан Украина президентига раҳмат айтганини» маълум қилди. Кейин у бошқа беларуслик сиёсий маҳбуслар келтирилаётган автобусларни кўрган — улар орасида Виктор Бабарико, Максим Знак ва Марина Золотова ҳам бўлган. «Қувончимни сўз билан ифода қилиш қийин. Бу ерда энг муҳими — ўша лаҳзанинг ўзи содир бўлгани. Албатта, яна такрор айтаман: бу ишда қатнашган барча томонларга — сиёсатчиларга, дипломатларга, махсус хизматларга чин дилдан миннатдорман», — дея қўшимча қилди у.
