Япония 5 та йўналишда ўзбекистонлик талабаларга грант ажратади

Япониянинг “Nippon Foundation” жамғармаси Ўзбекистон таълим тизими учун бир неча млн доллар грант ажратади. Бу ҳақда япониялик ҳамкорлар иштирокида 7-8 август кунлари бўлиб ўтган илмий-амалий семинарда Жаҳон иқтисодиёти ва дипломатияси университети ректорининг биринчи ўринбосари Акрам Умаров маълум қилди.

“Марказий Осиёда кўплаб давлатларнинг манфаати тўқнашади. Фикримча, Япония ҳам ўзи учун қизиқ бўлган йўналишларни таҳлил қилган ва юмшоқ куч сифатида таълим соҳасини танлаган. Япония бош вазири Фумио Кишида 9–12 август кунлари Марказий Осиёнинг қатор давлатларига ташриф билан келаётгани ҳам минтақанинг Токио ташқи сиёсатида муҳимлигини англатади”, дейди Умаров.

“Nippon Foundation” жамғармаси грант ажратишдан аввал Ўзбекистон таълим тизимини ўрганиш мақсадида ЖИДУ қошидаги Истиқболли халқаро тадқиқотлар институти билан ҳамкорликда тадқиқот ўтказган.

Тадқиқотда Тошкент шаҳри, Қорақалпоғистон Республикаси, Фарғона, Самарқанд ва Сурхондарё вилоятларидаги олий таълим муассасалари қамраб олинган. 1270 нафардан ортиқ респондент – ​​талабалар, олий ўқув юртлари раҳбарияти ва профессор-ўқитувчилари, соҳа мутахассислари иштирокида социологик сўров ва чуқурлаштирилган интервюлар ўтказилган.

Тадқиқот натижаларидан келиб чиқиб, таълим грантини IT, муҳандислик, тиббиёт, фармацевтика ва таржимонлик соҳаларига ажратишга қарор қилинган. Келажакда Ўзбекистон бозорида бу соҳаларга талаб юқори бўлиши кутилмоқда.

ИХТИ Япон дастурлари лойиҳаси директори Меҳринисо Абдурасулованинг маълум қилишича, ўзбек талабалари ушбу соҳалар бўйича Япониянинг топ олийгоҳларида бепул таълим олишади. Лойиҳа 2025 йил март ойидан бошланиши режалаштирилган.