БМТ: Украинада тинч аҳоли ўлими кескин ошди

Бирлашган Миллатлар Ташкилотининг Инсон ҳуқуқлари бўйича Олий комиссари бошқармаси (ИҲОКБ) Украинада Россия ҳарбий агрессияси натижасида ҳалок бўлган ва яраланган тинч аҳоли сони ҳақидаги жорий маълумотларни эълон қилди. 6 сентябр куни тақдим этилган ҳисоботга кўра, 2022 йил 24 февралдан 2024 йил августи охиригача Украина тинч аҳолиси орасида яраланганлар сони камида 24 614 кишини, ҳалок бўлганлар сони эса 11 743 нафарни ташкил қилган.

«2024 йил август ойида Украинада камида 184 нафар тинч аҳоли ҳалок бўлди, 856 нафари яраланди, бу 2024 йилдаги қурбонлар сони бўйича июлдан кейинги иккинчи ой», — дейди ойлик ҳисобот муаллифлари. Уларнинг айтишича, июл ойида камида 219 нафар тинч аҳоли ҳалок бўлган, яна 1018 нафари яраланган.

Тинч аҳоли қурбонлари сонининг кўплигини ИҲОКБ кўплаб қурбонлар билан якунланган оммавий ҳодисалар, хусусан Константиновка, Донецк вилояти ва Харкивда, шунингдек, фронт чизиғи яқинида, айниқса Донецкда ҳар куни содир бўлаётган ҳужумлар билан боғлайди.

Россия ҳаво ҳужумлари тажовузкор бўлиб бормоқда

Бошқа нарсалар қаторида, ҳисобот муаллифлари 26 август куни Россия қуролли кучларининг Украина энергетика инфратузилмасига кенг кўламли мувофиқлаштирилган ҳужумини таъкидладилар. У 15 та ҳудуднинг энергетика инфратузилмасига катта зарар етказди, Киев ва Украинанинг ўнта вилоятида тинч аҳоли ўлими ва жароҳатланишига олиб келди. БМТ ИҲОКБ маълумотларига кўра, бу 2024 йил 22 мартдан бери тўққизинчи шундай ҳужумлар тўлқини бўлди.

Август ойида 13 та таълим муассасаси вайрон қилинган, 38 таси шикастланган. Шунингдек, ўтган ёз ойида иккита тиббиёт муассасаси вайрон бўлган, 28 таси шикастланган.

БМТ ИҲОКБ ҳисобот тўлиқ эмаслигини таъкидлади

Ҳисобот муаллифлари тинч аҳоли орасидаги қурбонлар сони кам баҳоланаётганини тан олди. Бу, айниқса, 2022 йилда Россия Федерациясининг кенг кўламли агрессияси бошланганда узоқ муддатли шиддатли ҳарбий операциялар бўлган шаҳарларга тегишли - масалан, Донецк вилоятидаги Мариупол, Луҳанскдаги Лисичанск, Попасная ва Северодонецк. 

Бирлашган Миллатлар Ташкилоти тасдиқланган маълумотларига кўра, Россия Федерациясининг Украинадаги кенг кўламли уруши пайтида 5692 эркак, 3534 аёл, 338 ўғил ва 275 қиз бола ҳалок бўлган. Россия тажовузи натижасида ҳалок бўлган 28 нафар бола ва 1876 нафар катталарнинг жинси ҳали аниқланмаган.

2024 йил август ойида камида 107 эркак, 69 аёл, тўрт ўғил ва тўрт қиз бола вафот этди. Бундан ташқари, 434 нафар эркак, 371 нафар аёл, 32 нафар ўғил ва 19 нафар қиз бола жароҳат олган. Ва шу йилнинг саккиз ойида, БМТ маълумотларига кўра, Россия бошлаган уруш туфайли 1355 нафар Украина фуқароси ҳалок бўлган, 2023 йилда - 1967 ва 2022 йилда - 8427.